Atambayevning Toshkentga tashrifi qachon amalga oshirilishi maʼlum qilindi
Qirgʻiziston prezidenti Almazbek Atambayev oktyabr oyi boshida Toshkentga tashrifni amalga oshirishni rejalashtirgan. Bu maʼlumotni “24.kg” agentligi davlat rahbari apparatidagi manbaga asoslangan holda tarqatgan.
Qayd etilishicha, Qirgʻiziston rahbari Oʻzbekistonga javob tashrifini amalga oshiradi. Oʻzbekiston prezidenti Shavkat Mirziyoyev oʻtgan haftada Bishkekka tashrifi vaqtida qoʻshni davlat rahbarini Toshkentga taklif qilgandi. Shavkat Mirziyoyev Atambayevga Bishkekka safari yakunlari boʻyicha minnatdorchilik maktubi yoʻllagan.
Oʻzbekiston rahbari hukumatga yaqin kunlar ichida erishilgan kelishuvlarning toʻliq amalga oshirilishini taʼminlash hamda muzoraka va uchrashuvlar natijasi boʻyicha imzolangan bitimlar asosida yoʻl xaritasini ishlab chiqish topshirigʻini bergan.
“Sizning Oʻzbekistonga ikki davlatning koʻplab sohalardagi hamkorligini chuqurlashtirish yoʻlidagi muloqotni davom ettirish uchun javob tashrifi amalga oshirishingizni sabrsizlik bilan kutamiz”,- deyilgan maktubda.
Almazbek Atambayevning Toshkentga tashrifi doirasida biznes-forum va ikki mamlakatda ishlab chiqarilgan mahsulotlar koʻrgazmasi tashkil etilishi koʻzda tutilgan.
