Oʻzbekiston va Qozogʻiston harbiy hamkorlikni muhokama qildi
“Sputnik” xabariga koʻra, Oʻzbekiston prezidenti huzuridagi xavfsizlik kengashi kotibi Viktor Mahmudov Qozogʻiston mudofaa mahkamasi rahbari general-polkovnik Saken Jasuzoqov bilan uchrashdi.
Uchrashuv davomida tomonlar harbiy hamkorlikning hozirgi ahvoli va istiqbolli yoʻnalishlari haqida fikr almashishdi. Qayd etish joiz, joriy yilda ikki mamlakat oʻrtasida harbiy-texnik hamkorlik boʻyicha kelishuv imzolanishi rejalashtirilgan. Bu haqda Qozogʻiston mahkamasi matbuot xizmati xabar berdi.
Ilgariroq Qozogʻiston va Oʻzbekiston mudofaa mahkamalari ikki tomonlama munosabatlar tarixida ilk bor harbiy hamkorlik rejasini imzolagan edi. Imzolangan hujjatda harbiy taʼlim sohasida hamkorlikda qoʻshinlarning tezkor va jangovar tayyorgarligi doirasida tadbirlar oʻtkazishni koʻzda tutilgan.
