Oʻzbekiston harbiylari Rossiya maxsus boʻlinmalari tajribasi bilan tanishadi
“Sputnik” sayti xabar qilishicha, 23 avgustdan 26 avgustgacha Oʻzbekiston harbiy delegatsiyasi Samara viloyatida Rossiya maxsus boʻlinmalarining (spetsnaz) tayyorgarlik jarayoni bilan tanishadi. Bu haqda Rossiya Mudofaa vazirligi xabar bergan.
Xabarda aytilishicha, Oʻzbekiston bosh shtabi va Qurolli Kuchlar akademiyasi ofitserlari Volgaboʻyidagi Markaziy harbiy okrugning birlashma va harbiy qismlariga tashrif buyurishadi, taktik mashgʻulotlarda ishtirok etishadi, maxsus operatsiyalarni rejalashtirish, oʻtkazish va har tomonlama taʼminlash boʻyicha tajriba almashishadi.
Mazkur tashrif Oʻzbekiston va Rossiya Mudofaa vazirliklarining 2017 yilga moʻljallangan ikki tomonlama harbiy hamkorlik borasidagi rejasiga asosan amalga oshirilmoqda.
Ilgariroq Toshkentda boʻlib oʻtgan muzokaralarda markaziy harbiy okrug qoʻshinlari qoʻmondoni general-polkovnik Vladimir Zarudnitskiy va Oʻzbekiston mudofaa vaziri general-polkovnik Qobul Berdiyev hamkorlikni rivojlantirishdan manfaatdor ekanliklarini tasdiqlashgandi.
Erishilgan kelishuvlarga muvofiq, yil oxiriga qadar mintaqaviy hamkorlik masalalari boʻyicha keng miqyosdagi shtab muzokaralari, Oʻzbekistonning Forish poligonida hamkorlikdagi taktik oʻquv mashgʻulotlari va boshqa tadbirlar oʻtkaziladi.
