AQSh prezidenti Donald Tramp Saudiya Arabistoniga qilgan safari chogʻida Saudiya qiroli Salmon bin Abdulaziz bilan 110 milliard dollar qiymatiga teng qurol-yaroq bitimini imzoladi. Oq Uy tarafidan berilgan bayonotga koʻra, bu shartnoma AQSh tarixida imzolangan eng yirik qurol-yaroq shartnomasidir. Xususan bu shartnomaning Tramp va Salmon oʻrtasida imzolanishi 110 milliard dollarlik Amerika qurolining sotilganligini anglatadi.
Reuters axborot agentligi tarqatgan xabarga koʻra, mazkur shartnoma 6 milliard dollar qiymatidagi 150 dona Blackhawk rusumli vertolyotni ham oʻz ichiga oladi.
Fransuz AFP axborot agentligiga intervьyu bergan Oq Uy vakilining taʼkidlashicha, oʻzaro bitimga binoan Saudiya Arabistoni mintaqada yuritilayotgan terrorga (Islomga) qarshi amaliyotlarga koʻproq hissa qoʻshadi va AQSh harbiylarining zimmasidagi yukni yengillashtiradi.
Oq Uy vakili bu shartnomalar AQSh va Saudiya Arabistonining xavfsizlik sohasidagi hamkorligini sezilarli darajada kengaytirishini ham qoʻshimcha qildi.
“Bu shartnomalar Saudiyaning butun mintaqa boʻylab aksilterror operatsiyalardagi ishtirok etish imkoniyatlarini kengaytiradi”, dedi AQSh maʼmuriyati xodimi.
Tramp bundan bir oy avval bergan bayonotida ar-Riyodni Voshingtonga nisbatan adolatsizlik qilayotganlikda ayblagan edi. Trampga koʻra, AQSh Saudiyani himoya qilish uchun juda koʻp mablagʻ sarflaganligiga qaramay, ar-Riyod Voshingtonning himoyasi ostida qolishi uchun zimmasiga tushganini bajarmagan. Shuningdek, Tramp saylov kompaniyasi paytida ham Saudiyaga qarata shunday tanqidlar yogʻdirgan edi.
