Qozogʻiston parlamentining quyi palatasi “Qozogʻiston va Qirgʻiziston hukumati oʻrtasida yevroosiyo iqtisodiy integratsiyasi sharoitlarida iqtisodiy hamkorlikni rivojlantirish haqidagi Bitimni ratifikatsiya qilish toʻgʻrisida”gi qonun loyihasini tasdiqladi.
“Bitimga koʻra, Qozogʻiston Qirgʻizistonga Yevroosiyo iqtisodiy ittifoqiga integratsiya jarayonida koʻmak berish maqsadida 100 million AQSh dollarlik yordam koʻrsatadi”, – deya maʼlum qildi Qozogʻiston milliy iqtisodiyot vaziri Timur Suleymenov.
Uning taʼkidlashicha, yordam Qirgʻizistonning YeOIIga qoʻshilishi boʻyicha “yoʻl xaritalari”da nazarda tutilgan tadbirlarni amalga oshirishga yoʻnaltirilgan.
“Xususan, YeOII bojxona chegarasining qirgʻiz qismidagi bojxona infratuzilmasini yaxshilash, Qirgʻiziston Respublikasi sanitariya, veterinariya va fitosanitar tizimini YeOII talablariga mos keltirish boʻyicha harakatlarga yoʻnaltirildi”, – deya qoʻshimcha qilib oʻtdi u.
Aniqlik kiritilishicha, yordam bosqichma-bosqich, texnik koʻmak toʻgʻrisidagi alohida hukumatlararo bayonnomalarga muvofiq taqdim etiladi.
