Spaycer: Rossiya xato yoʻlni tanladi
Oq uy matbuot kotibi Shon Spaycer Asad rejimini har tomonlama qoʻllab-quvvatlab kelayotgan Rossiyani xato yoʻlni tanlaganlikda aybladi.
“Rossiya Suriya, Shimoliy Koreya va Eron bilan yonma-yon turibdi. Rossiyadan tashqari bu davlatlar muvaffaqiyatsiz davlatlardir. Bunday vaziyatda shubhasiz Rossiya oʻzini xalqaro hamjamiyatdan izolyatsiya qilib olmoqda”, dedi Oq uy matbuot kotibi.
Spayser Asad rejimi allaqachon kimyoviy qurolga ega boʻlmasligi va bu boradagi bitimga Rossiya ham imzo chekkanligini eslatib oʻtdi. Spayserga koʻra, Asad kimyoviy qurolni boshqa qoʻllamaslik uchun Moskva unga oʻz taʼsirini oʻtkazishi lozim.
Turkiston:
Rossiya buyuk davlatlar qatorida tursada, biroq Yaqin Sharq mintaqasida oʻz bilganicha ish yuritish imkoniyatiga ega emas. Shunga koʻra Rossiya u yerlarda oʻzi tuzgan reja asosida ish olib bora olmaydi. Uning u yerlarda qiladigan birdan-bir ishi kelishilgan bitim doirasida Amerikaga xizmat koʻrsatishdan iboratdir.
Shuning uchun IShIDga qarshi kurash olib borayotganligini daʼvo qilayotgan Rossiya Iroqda hech qanday faoliyat olib borayotgani yoʻq. Vaholangki yirik miqdorda neftu gaz va resurslarga boy boʻlgan Iroqda ham IShIDning anchagina nufuzi bor. Mana shundan koʻrinib turibdiki, Rossiya bu mintaqalarda AQShning ruxsati va koʻrsatmasi bilangina ish yuritadi. Rossiya bu borada Amerikaga biroz boʻlsa ham, taʼsir oʻtkazishga qodir emas.
Shuningdek, Rossiya Suriyada ham, oʻzining mustaqil siyosatini yurgiza olmaydi. U faqat oʻziga yuklangan vazifani qoyilmaqom qilib amalga oshirmoqda xolos. Yaʼni rus hukmdorlari siyosiy jihatdan uzoqni koʻra olmaganliklari tufayli AQShning Suriyadagi oʻzi qila olmaydigan ishlarini bajarib bermoqda. Spayserning soʻzlari esa, Suriya masalasida AQShni oppoq qilib koʻrsatib, barcha aybni Rossiyaga yuklashdan boshqa narsa emas.
