Tanqid va sukut
Britaniya poytaxti Londonda yuzaga kelgan va 4 kishining oʻlimiga hamda 20 kishining jarohat olishiga sabab boʻlgan hujum butun dunyo ommaviy axborot vositalari diqqat markazini egalladi. Voqea rivoji soat sayin yoritib turildi. BMT va NATO kabi nufuzli tashkilotlarning bosh kotiblari, shuningdek butun Yevropa davlatlari, AQSh, Turkiya, Quvayt, Sudan kabi bir qancha davlatlardan bir vaqtning oʻzida tanqidlar yogʻdirildi. Prezidentlar, bosh vazirlar, tashqi ishlar vazirlari va boshqa masʼullar alohida-alohida hujumni tanqid ostiga olishdi.
Musulmon oʻlkalarining koʻzga koʻringan davlatlaridan biri Turkiyaning Prezidenti – Islom ulamolari kengashining rahbari doktor Yusuf Qarzoviyning tili bilan aytganda, butun dunyo musulmonlari koʻz tikib turgan musulmon rahbar – Rajab Toyyib Erdugʻon ham London parlamenti binosi oldida yuzaga kelgan hujumni qattiq qoraladi, Birlashgan qirollik chekayotgan alamlarni ich-ichidan his qilayotganligini bildirdi.
Biroq achinarlisi shundaki, soʻngi bir necha kun ichida yuzlagan oddiy musulmonlar dunyo koʻz oʻngida qatl qilindi. Hech kimdan sas-sado chiqmadi. AQSh uchoqlari 16 mart kuni Suriyaning Halab shahri gʻarbida joylashgan masjidga uyushtirgan hujumda 75 nafar namoz oʻqiyotgan oddiy musulmon aholi oʻldirildi, yuzdan ortiq kishi jarohat oldi. Undan soʻng yana oʻsha AQSh uchoqlari Suriyaning Raqqa shahrida maktab binosini hujumga tutishi oqibatida 42 nafar kishi hayotdan koʻz yumdi. AQShning IShID bahonasida uyushtirgan oxirgi hujumida esa, oddiy fuqarolardan iborat 200dan ortiq kishi oʻldirildi. Ular orasida ayollar va yosh bolalar ham bor. Musulmonlarning jonini va molini himoya qilish uchun armiyani safarbar qilishi lozim boʻlgan Islom oʻlkalarining rahbarlari hatto bir ogʻiz tanqid qilib qoʻyishga ham yaramadi. Ammo Londonda 4 kishi oʻldirilar ekan…
Balki AQSh bu qirgʻinlarini Turkiyada joylashgan Injirlik havo bazasidan koʻtarilgan harbiy uchoqlari orqali amalga oshirayotganligi Islom oʻlkalari rahbarlarining tili qisiqligiga sabab boʻlayotgandir?!
