Atambayev siyosatda qoladigan boʻldi
Soʻnggi ikki yil mobaynida prezidentlikdan ketganidan soʻng siyosatda qolmasligini, ijod va tadbirkorlik bilan shugʻullanishini bildirib kelayotgan Almazbek Atambayev 28 fevral kuni Rossiya prezidenti Vladimir Putin bilan uchrashganidan soʻng qarorini oʻzgartirib, siyosatda qolishiga shaʼma qilgan edi.
Bugunga kelib esa prezidentlikdan ketganidan soʻng ham siyosatda qolishini ochiq bayon qila boshladi.
“AKIpress” saytining xabar qilishicha, Almazbek Atambayev 24 mart kuni Bishkekda boʻlib oʻtgan matbuot anjumanida siyosatda qolish uchun albatta biror mansabda boʻlish shart emasligini aytgan.
““Sen siyosat bilan shugʻullanmasang, siyosat sen bilan shugʻullanadi” degan iborani unitmaslik kerak. Men Bosh vazir yoki spiker boʻlmayman. Agar men biror mansabda qolishni istaganimda umuman boshqacha referendum oʻtkazgan boʻlar edim. Qoʻshni mamlakatlar prezidentlari meni koʻndirmoqchi boʻlganlari kabi, aholining 80 foizi ham Atambayev ikkinchi muddatga prezident boʻlib saylansin deb ovoz berishgan boʻlar edi. Agar men qolishni xohlaganimda, qolar edim. Ammo men, bizda bosh vazir, spiker boʻlishni xohlagan kuchli siyosatchilar yetarlicha bor deb oʻylayman. Men shuni oʻzi yetarli deb oʻylayman”,- dedi Atambayev.
Uning soʻzlariga koʻra, u oʻzining Qirgʻiziston sotsial-demokratik partiyasi (QSDP) masalalari bilan shugʻullanadi.
“Unga juda katta kuch sarflandi. Uni tozalanishi va yangilanishini istar edim. Ammo men biror mansabni egallashim shart emas”,- deya qoʻshimcha qildi Atambayev.
