Isroil: Turkiyadagi referendum Isroil uchun ham muhim ahamiyatga ega
Turkiya va Isroil oʻrtasida yuzaga kelgan iliq munosabatlar ortidan ikki davlat delegatsiyalarining oʻzaro tashrifi jadallashdi. Turkiya madaniyat va turizm vaziri Nabi Avjining Isroilga qilgan safaridan bir oy oʻtib, jurnalistlar delegatsiyasi birinchi marta Turkiyadan Isroilga yoʻl oldi.
Turk jurnalistlari bilan uchrashib, ularning savollariga javob bergan Isroil Tashqi ishlar vazirligining matbuot kotibi Emmanuelь Naxshon 16 aprel kuni Turkiyada oʻtkazilishi moʻljallangan referendumning Isroil uchun ham muhim ahamiyatga egaligini maʼlum qildi. Naxshonning taʼkidlashicha, Turkiya prezidenti Rajab Toyyib Erdugʻon Yaqin Sharq mintaqasi uchun muhim shaxs hisoblanadi.
“Isroil Turkiyada nima boʻlayotganini diqqat bilan kuzatib bormoqda. Mamlakatingizda boʻlayotgan hamma ishlarning bizga yaqindan taalluqli joyi bor. Turkiya demokratik davlat sifatida oʻz yoʻlini tanlaydi. Bu referendumning ahamiyati juda katta. Chunki Erdogʻan juda muhim mintaqaviy aktyordir. Uning siyosiy kelajagi Yaqin Sharqning kelajagi uchun muhim ahamiyat kasb etadi”, dedi Naxshon.
Nahshoning qayd etishicha, Isroil va Turkiya oʻrtasida energetika borasida ham kuchli hamkorlik mavjud. Isroil energetika vaziri Yuval Steinitz aprel oyida Turkiyaga borishi kutilmoqda.
Ayni paytda Turkiya va Isroil oʻrtasidagi tijorat hajmi kundan kunga ortib borayotgani aytilmoqda. Isroilning Anqaradagi elchisi Eytan Noega koʻra, ikki davlat oʻrtasidagi qariyb 4 milliard dollarlik tijorat hajmining imkoniyati buning ikki barobariga tengdir. Bu hajm bir necha yilda 8 milliard dollarga yetadi.
“Ikki davlat oʻrtasidagi energetika hamkorligini kuchaytirish niyatidamiz. Biz bu imkoniyatga egamiz. Majburiyat va ishonch tamoyillariga asoslangan aloqalarimiz kontekstida oldimizga qoʻygan maqsadimizga yetishimiz mumkin. Isroilga koʻproq sarmoya yotqizilishini istaymiz. Baʼzi noqulayliklarga qaramay, biz Turkiya iqtisodiyotiga ishonamiz”, deydi Eytan Noe.
