Rossiya, Turkiya va Eron Suriya taqdirini xal qilish uchun Ostonada yana yigʻilishdi
6 fevral kuni Ostona shahrida Suriyadagi vaziyatni tartibga solish boʻyicha 23-24 yanvar kunlari shu shaharda erishilgan kelishuvlar asosida yaratilgan tezkor guruhning ilk yigʻilishi boshlandi.
Ostonada 23-24 yanvar kunlari Suriya masalasi boʻyicha kafil mamlakatlar – Rossiya, Eron va Turkiya Suriyada oʻt ochishni toʻxtatish rejimiga rioya qilinishi ustidan nazorat mexanizmini yaratishga kelishib olgandi. Kafil mamlakatlar oʻzlari eʼlon qilgan bayonotda “IShID” va “Jabhat an-Nusra”ga qarshi kurashishda davom etish niyatlarini tasdiqlagandi.
Eron, Turkiya va Rossiya Suriya inqirozini tartibga solish uchun BMT koʻmagida Ostona platformasida hamkorlik qilishga kelishib oldi. Ushbu mamlakatlar, shuningdek, Suriyaning yaxlitligi va suverenitetini tasdiqladi.
RIA Novosti manbasi 5 fevral kuni maʼlum qilishicha, uchrashuvda Rossiya, Turkiya, Eron, BMT hamda Iordaniyadan ekspertlar ishtirok etadi.
Uchrashuvdan koʻzlangan maqsad Suriyadagi nizo tomonlarining jangovar harakatlarni toʻxtatish rejimiga rioya qilishining borishini muhokama qilish, yarashuvning buzilishini nazorat qilish va buning oldini olish boʻyicha choralar ishlab chiqish, Suriya hukumati va muxolifat oʻrtasida oʻzaro ishonchni oshirish, shuningdek, gumanitar hamkorlik masalalarini hal qilishdan iborat.
