Xeyli: Rossiya Qrimni Ukrainaga qaytarib bermasa sanktsiyalar davom etaveradi
AQShning Birlashgan Millatlar Tashkilotidagi doimiy yangi vakili Nikki Xeyli Ukraina sharqidagi tajovuzkor harakatlari sababli Rossiyani qattiq tanqid qildi. BMT Xavfsizlik Kengashida Ukraina masalasi muhokama qilingan majlisda soʻzga chiqqan Xeyliga koʻra, yil boshidan buyon Ukraina sharqida avj olgan zoʻravonliklar Rossiyaning aybi bilan yuzaga kelmoqda.
“Bu yerda men ishtirok etayotgan birinchi yigʻilishdayoq Rossiyani agressiv harakatlari tufayli tanqid qilishga majburligimning oʻzi bir musibatdir. Rossiya bilan aloqalarimizni rivojlantirishni istaymiz, lekin Ukraina sharqidagi dahshatli vaziyat ruslarning harakatlarini ochiq va qattiq tanqid qilinishini talab qiladi”, dedi AQShning BMTdagi doimiy yangi vakili.
Ukraina sharqidagi mojarolar tufayli minglab fuqarolar nochor ahvolga tushib qolganligini va turar joylar vayronaga aylanib, kundan kunga kuchayib borayotgan inqiroz tufayli minglab insonlarning hayotlari xavf ostiga qolayotganligini bildirgan Xeyli Rossiyani Ukrainaning sharqidagi zoʻravonliklarni bas qilishga chaqirdi.
Xeyli Qrimning Ukrainaga tegishli ekanligiga urgʻu berar ekan, uning Ukrainaga qaytarib berilishi shartligini, aksincha Rossiyaga nisbatan qoʻllangan sanktsiyalar olib tashlanmasligini taʼkidladi.
“Agar Qrim Ukrainaga qaytarib berilmasa Rossiyaga qarshi qoʻllangan sanktsiyalar davom etaveradi”, deya taʼkidladi Xeyli.
Bundan avval Rossiya bilan yaxshi munosabatlar oʻrnatish itagida ekanligini bildirgan AQSh prezidenti Donald Tramp esa Rossiyaga qarshi qoʻllangan sanktsiyalarni olib tashlashi mumkinligi haqida aytgan edi.
