Jubayr: Biz Tramp bilan hamkorlik qilishni intizorlik bilan kutyapmiz
Saudiya tashqi ishlar vaziri Adil Jubayr AQShning yangi prezidenti Donald Tramp maʼmuriyati borasida ijobiy koʻz qarashda ekanliklarini bildirdi. Jubayrning taʼkidlashicha, Saudiya hukumati ikki mamlakat uchun manfaatli boʻlgan barcha masalalar boʻyicha Tramp bilan hamkorlikda faoliyat olib borishni orzuqib kutmoqda.
“Tramp maʼmuriyati borasida ijobiy koʻzqarashdamiz. Ikki mamlakat uchun manfaatli boʻlgan barcha masalalar boʻyicha hamkorlikda faoliyat olib borishni sabrsizlik bilan kutyapmiz”, dedi Saudiya tashqi ishlar vaziri Adil Jubayr.
“Al-Arabiya” televizion kanali orqali bayonot bergan Adil Jubayr Tramp maʼmuriyatining IShIDni magʻlub qilish, AQShning dunyodagi rolini takror yuksaltirish va Eron masalasi haqidagi rejalarini mamnuniyat bilan qabul qilishini bildirdi.
Shuni aytib oʻtish lozimki, Doland Tramp saylov oldi kampaniyasi chogʻida musulmonlarga qarshi qizgʻin bayonotlar berar ekan, Saudiya haqida alohida toʻxtalib, uning Amerikadagi mavjud barcha omonat mablagʻlarini oʻzlashtirib olishga ishora qilgan edi.
“Saudiya boy davlatdir, shuning uchun u bizdan olayotgan siyosiy va xavfsizlik yordami evaziga pul toʻlashi lozim”. “Saudiya yaqinda katta qiyinchiliklarga duchor boʻlib qoladi va bizning yordamimizga muhtoj boʻladi. Agar biz boʻlmaganimizda Saudiya aslo mavjud boʻlmas edi va saqlanib qolmas edi…”, degan edi Tramp Amerikaning En-Bi-Si televideniyesiga bergan intervyusida.
Shuningdek, AQSh kongressi tarafidan tasdiqlangan “gasta” nomli qonun ham Saudiya Arabistonini biroz noqulay ahvolga solib qoʻydi. Chunki bu qonun 2001 yil 11 sentyabrda Nьyu-Yorkdagi xalqaro savdo markaziga uyushtirilgan hujumlarda halok boʻlganlarning oilalari uchun Saudiya Arabistoniga qarshi daʼvo ochish imkonini beradi hamda uni kompensatsiyalar toʻlashga majbur qiladi.
