Qrim musulmonlariga jinnilardek muomala qilinmoqda
Rossiya tomonidan ishgʻol qilingan Qrimning qoʻgʻirchoq hukumati musulmonlarga nisbatan Sovet Ittifoqi davrida boʻlgani kabi jinnilardek muomala qilmoqda. Yaʼni diniy ayblovlar bilan ayblangan musulmonlar psixiatrik ekspertizadan oʻtkazish bahonasida ruhiy kasalxonaga olib ketilyapti. Hizb ut-Tahrir uyushmasiga aʼzolikda ayblanib hibsga olingan va majburan psixiatrik ekspertizaga olib ketilgan Muslim Aliyev besh kundan buyon ruhiy kassallar davolanadigan kasalxonada ushlab turilibdi.
Doktorlar Aliyevdan psixiatrik tekshiruv (shaxsning aqldan ozgan yoki ozmaganligini aniqlash) jarayonida unga qoʻyilayotgan ayb, yaʼni Hizb ut-Tahrirga doir provokatsion savollar berishmoqda. Bu haqida Aliyyevning advokati Edem Semedlyayyev maʼlum qildi.
“Umumiy ahvoli yaxshi. Ammo meni xavotirga solgan joyi shuki, shifokorlar unga Hizb ut-Tahrirga aʼzoligi, Qrim muftisi, IShID va shiyalar haqida savollar berishmoqda. Taxminan bu savollar tergov xodimlari tomonidan tayyorlangan. Chunki bilishimcha, psixiatriya klinika xodimlari bunday savollar bilan shugʻullanishmaydi”, deydi 21-noyabr kuni mijozining ahvolidan xabar olgan advokat Edem Semedlyayyev.
Advokatlar Edem Semedlyayyev va Emil Kurbedinovlar barcha hamkasblarini va jurnalistlarni bu maʼlumotlarni tarqatishga daʼvat etdilar. Ularga koʻra, boshqa mahbuslar ham navbat bilan psixiatriya ekspertizasiga yuboriladi.
“Olti nafar Qrimlik siyosiy mahbuslar ham psixiatrik shifoxonasiga yuborilishi rejalashtirilgan. Biz Qrim tatarlariga qarshi qoʻllanilayotgan ruhiy qiynoqlar ortib borayotganligiga guvoh boʻlyapmiz”, deydi advokat Emil Kurbedinov.
