Peskov: Amerika boʻlmasa Suriyada jang qila olmaymiz
Kreml matbuot kotibi Dmitriy Peskov Suriyada terrorizmga qarshi samarali shaklda kurash olib borish uchun AQSh bilan hamkorlik qilish lozimligini bildirdi. Peskovga koʻra, Rossiya AQSh bilan hamkorlik qilmasa, Suriyada aslo muvaffaqiyatga erishishi mumkin emas.
“Biz hamkorlikka tayyormiz. AQSh bilan hamkorlik qilmay turib, Suriyada terrorizmga qarshi samarali kurash olib borolmasligimiz mumkin. Biroq bu borada muammo amerikalik hamkorlarimizga borib taqalmoqda”, dedi Moskvada matbuot vakillariga bayonot bergan Peskov.
Peskov jurnalistlarning “Suriyada Rossiya va AQSh hamkorligi qayta tiklanadimi”, degan savoliga “bu savolni amerikalik hamkorlarimizga berish kerak”, deb javob berdi.
Boshqa tomondan Rossiya parlamenti yuqori palatasi federatsion kengashining xalqaro ishlar qoʻmitasi raisi Konstantin Kosachev Suriyada qachon qonun ustivorligi taʼminlansa, oʻshanda Rossiya Suriyani tark etishini bildirdi.
“Biz Suriyaning ichki ishlariga aslo aralashmaymiz. Suriyada qonun va qoidalar ustivorligi taʼminlangandan keyingina Rossiya u yerdan chiqadi” dedi Kosachev.
Avvalroq Rossiya va Amerika oʻrtasidagi Suriyaga doir muzokaralarning toʻxtatilganligi eʼlon qilingan edi. Bu haqida AQSh Tashqi ishlar vazirligining notigʻi Jon Kirbi tomonidan berilgan yozma bayonot orqali maʼlum qilingan edi. Kirbining bayonotida aytilishicha, Rossiya Suriyada amalga oshirish uchun bergan vaʼdalarini bajarishda muvaffaqiyatsizlikka uchragan.
Rossiya Suriyada harbiy qirgʻinlarini boshlaganiga bir yildan oshdi. Inson haqlari tashkilotlarining maʼlum qilishicha, Rossiyaning havo hujumlarilari oqibatida minglab tinch aholi vakillarining yostigʻi qurigan.
