Rossiya Qozogʻistonga 5 ta S-300 raketaga qarshi mudofaa tizimini yetkazib berdi
Xabar qilinishicha, seshanba, 2 avgust kuni Rossiya Federatsiyasi mudofa vaziri Sergey Shoygu va Qozogʻiston mudofa vaziri Imangali Tasmagambetov oʻrtasida muzokaralar boʻlib oʻtgan.
Muzokaralarda Rossiya va Qozogʻiston prezidentlari oʻrtasidagi harbiy-texnikaviy kelishuvga asosan, Rossiya tomonidan Qozogʻistonga 5 ta S-300 zenit raketa tizimi taqdim etilgani maʼlum qilingan.
Uchrashuvda Kollektiv xavfsizlik tashkiloti doirasi imzolangan kelishuvga koʻra, oʻzaro harbiy texnikalarni olib oʻtish jarayonida yengilliklar yaratilgani qayd etilgan.
Muzokaralar natijasida oʻzaro raketa hujumlaridan ogohlantirishda tizimlararo kelishuvga erishilgani aytib oʻtilgan.
Bundan tashqari, Rossiya 170 donadan ortiq zenit raketalarini Qozogʻistonga topshirish boʻyicha roʻyxatga olish jarayonini yakunlamoqda.
“Rossiya Federatsiyasi bilan harbiy-texnik hamkorlik doirasida Qozogʻistonga 5ta S-300 zenit-raketa majmualari taqdim etdi. Bundan tashqari, Rossiya tomoni ushbu majmualar uchun 170dan ortiq raketalarni roʻyxatga olish jarayonini tamomlamoqda”,- deyiladi xabarda.
2015 yildan Rossiya-Qozogʻiston harbiy texnik hamkorligi shartnomasi ishga tushib, uning doirasida Qozogʻiston qurolli kuchlari Rossiya armiyasiga beriladigan narxlarda zamonaviy qurol-aslahalar olish imkoniga ega boʻldi.
