Rossiyaning Anqaradagi elchisi Andrey Karlov agar Turkiyaning Rossiya bilan munosabatlarini butunlay yaxshilash maqsadi boʻlsa, urib tushirilgan samolyot uchun Anqara hukumati tovon toʻlash kerakligini bildirdi.
“(Rossiya prezidenti) Vladimir Vladimirovich (Putin) munosabatlarni takomillashtirish uchun nima kutayotganimizni aniq aytgan edi: uzr soʻrash, jinoyatchilarni jazolash va tovon toʻlash. Birinchisi amalga oshdi. Navbat ikkinchi va uchinchisiga keldi”, dedi Andrey Karlov Rossiyaning Interfaks axborot agentligiga bergan bayonotida.
Turkiya bosh vaziri Binali Yildirim avvalroq TRT axborot agentligiga bergan intervьyusida Rossiya harbiy samolyotining urib tushirilishiga nisbatan kerak boʻlsa, tovon toʻlashi mumkinligini bildirgan edi. Rus uchuvchisining oʻlimida aybdor deb topilgan Alparslon Chelik hozirda sud qilinmoqda.
Ayni paytda Kreml Turkiya Prezidenti Rajab Toyyib Erdogʻanning Rossiya prezidenti Vladimir Putinga yuborgan “uzr maktubi” haqida rasmiy xabar tarqatdi. Xabarga koʻra, Erdogʻan maktubda Turkiya va Rossiya oʻrtasida uzoq vaqtlardan buyon davom etib kelgan strategik sheriklik va doʻstna munosabatlarga zarar yetganidan chuqur tashvish bildirgan.
“Biz hech qachon Rossiya Federatsiyasiga tegishli samolyotning urib tushirilishi istagida boʻlgan emasmiz. Bunday niyatimiz ham boʻlgan emas”, “Biz hayotdan koʻz yumgan rus uchuvchisining oilasini turk oilasi sifatida koʻramiz. Koʻrilgan zararni qoplash uchun nima qilish kerak boʻlsa, biz bunga tayyormiz. Bundan tashqari rus uchuvchisining oʻlimida aybdor deb topilgan turk fuqarosi ustidan tergov jarayoni boshlangan”, deyiladi maktubda.
Biroq Rossiya SU-24 qiruvchi samolyotining turk havo hududini buzib kirishi sababli urib tushirilishi ortidan bayonot bergan Prezident Erdogʻan “Buning uchun kimdir uzr soʻrash kerak boʻlsa, u biz emasmiz. Havo hududlarimizni buzganlar uzr soʻrashlari shart”, degan edi.
