AQSh davlat kotibi o‘rinbosari Deniyel Rozenblyumning ma‘lum qilishicha, AQSh davlat departamenti 2017 moliyaviy yilda “Rossiya targ‘ibot mashinasi faol ishlayotgan” Markaziy Osiyo respublikalaridagi ommaviy axborot vositalari (OAV) bilan hamkorlikni davom ettirish va yanada kuchaytirish uchun qo‘shimcha mablag‘ so‘radi.
“Markaziy Osiyodagi odamlar va OAV bir-birlariga tayanib ma‘lumot olish o‘rniga, turli manbalardan xolisona (obektiv) axborotlar olish imkoniyatiga ega bo‘lishlari muhim ahamiyatga ega”,- dedi Rozenblyum.
Uning so‘zlariga ko‘ra, aks holda yangiliklar “birtomonlama” yoki noto‘g‘ri berilishi mumkin.
“Shu sababli biz mazkur byudjet talabida Markaziy Osiyo nashrlari bilan hamkorlikni davom ettirishni ta‘minlash maqsadida ularni moliyalashni nazarda tutdik”,- dedi Rozenblyum va bundan mahalliy jurnalistlar kasbiy mahoratini oshirish, ular tayyorlayotgan materiallar sifatini oshirish va OAV audiatoriyasini kengaytirish maqsad qilinganini aytib o‘tdi.
Shu bilan birga Rozenblyum, Markaziy Osiyo mamlakatlari Rossiya bilan kuchli tarixiy, siyosiy, iqtisodiy va madaniy aloqalarga ega ekanligini e‘tirof etdi. Ammo uning fikricha, bu respublikalar o‘zaro manfaat keltiradigan “boshqa davlatlar bilan ham hamkorlik qilish zarurligi”ni tushinib turishibdi.
“Bizning harakatlarimiz sharq, g‘arb va janubiy bozorlar bilan iqtisodiy aloqalarni kuchaytirishga qaratilgan. Bundan tashqari yaxshi moliyalashtirilgan Rossiya targ‘ibot mashinasi Markaziy Osiyo jamoatchilik fikriga sezirarli ta‘sir ko‘rsatadi”,- deya qayd etib o‘tdi Deniyel Rozenblyum.
AQSh kongressiga 11 may kuni Davlat departamentida “Rossiya va Xitoy tashviqotiga qarshi kurash” bilan shug‘ullanuvchi federal markaz tashkil etish to‘g‘risidagi qonun loyihasi taqdim qilingan edi.
