Isroilning Istanbuldagi bosh konsuli Shay Koen Isroil gazini Turkiya olqali dunyoga olib chiqish eng yaxshi yo‘l ekanligini ta‘kidladi. Koenning bildirishicha, to‘rt milliard dollar qiymatidagi bu loyihani amalga oshirish uchun xususiy sektor tayyor turibdi.
“Isroil gazini dunyoga olib chiqish uchun Turkiya eng yaxshi va eng qulay yo‘l, degan fikrga butunlay qo‘shilaman. Geosiyosiy nuqtai nazardan qaralganda energiya manbalarini sharqdan g‘arbga, janubdan shimolga tashib o‘tish uchun asosiy guzargoh vazifasini o‘tovchi Turkiya bo‘lmasa, energiya manbalarini diversifikatsiyalash juda qiyin bo‘ladi”, “Faqat quvur yotqizish, gaz sohasini kengaytirish va quvur Turkiyaning janubiy qirg‘oqlariga yetib borishi uchun bilishimcha, 4 milliard dollar zarur bo‘ladi. Bu esa investorlardan, qurilish kompaniyalaridan va ikki mamlakatdan jiddiy maqsadda ish yuritishni talab qiladi. Men eng kamida “bu maqsad xususiy sektorda bor” deb aytishim mumkin. Chunki xususiy sektor tarafidan allaqachon barcha chora tadbirlar ko‘rib qo‘yilgan. Loyihalarni amalga oshirish uchun faqat vaqt masalasi qoldi, xolos”. “Geosiyosiy sabablarga ko‘ra, Isroil gazining katta qismi Turkiya orqali chetga olib chiqilishi juda muhimdir”, dedi Isroil bosh konsuli.
Keyingi olingan xabarlarga ko‘ra, Turkiya-Isroil o‘rtasidagi munosabatlarda iliqlik kuzatilmoqda. 2010 yilda yuz bergan Moviy Marmara hodisasidan so‘ng Turkiya-Isroil o‘rtasidagi munosabatlar taranglashgani aytiladi. Biroq siyosiy tahlilchilarning da‘vo qilishicha, taranglik faqat og‘izdadir, amalda esa aloqalar har doimgidek, hatto har doimgidan ham yaxshiroq davom etib kelmoqda.
Afrika safari oldidan aeroportda matbuot anjumani tashkil qilgan Turkiya prezidenti Rajab Toyyib Erdug‘on Turkiya bilan Isroil o‘rtasidagi munosabatlarni yaxshilash uchun ijobiy qadamlar tashlanganligini bildirdi.
“Ijobiy o‘zgarishlar borasida bir nuqtaga keldik. Bizning talabimiz uzr so‘rash edi, u amalga oshdi. Kompensatsiya talab qildik, u ham bo‘ldi. Uchinchi talabimiz G‘azodan qamalni olib tashlash edi. Hozirda G‘azoda elektr va suv muammosi mavjud. Bu borada takliflar kiritdik. O‘zgarishlar ijobiyga o‘xshab ko‘rinyapti. Yana boshqa bir mavzu borki, maktab va shifoxonalar qurishga ruxsat berishsa… Bundan tashqari oziq-ovqat va dori-darimon borasida Turkiya orqali kelsa qabul qilamiz, deyishyapti”, dedi Turkiya prezidenti.
