Rossiya prezidenti Vladimir Putin o‘zining iqtisodiy maslahatchisi Aleksey Kudrinning ayrim jihatlarda G‘arbga bo‘ysunish zarurligi haqida bergan maslahatini qat‘iyan rad qildi. Bu haqida “Vedomosti” gazetasi xabar tarqatdi. Gazetaga ko‘ra, Putin so‘nggi nafasigacha Rossiya suverinitetini himoya qilishga va‘da bergan.
“Iqtisodiy rivojlanishni qo‘llab-quvvatlash uchun ayrim jihatlarda G‘arb talablariga bo‘ysunish zarur deb hisoblagan sobiq moliya vaziri Kudrin geosiyosiy keskinlik darajasini yengillashtirish haqida prezidentga maslahat berdi. Kudrinning hisoblashicha, geosiyosiy ambitsiyalarning ba‘zilaridan voz kechish texnologik va iqtisodiy sohalarda G‘arb bilan Rossiyaning o‘rtasini ajratib qo‘ygan bo‘shliqni kamaytirish imkonini beradi. Lekin Putin sobiq moliya vazirining taklifini rad qildi. Putinning ta‘kidlashicha, Rossiya o‘z suvereniteti borasida G‘arb bilan savdolashishi mumkin emas. Garchi Rossiya iqtisodiy va texnologik jihatdan rivojlangan davlatlar safida yurish uchun sa‘y-harakatlar olib borayotgan bo‘lsa ham, G‘arbga tobe bo‘lmasligi bildirgan Putin so‘nggi nafasiga qadar Rossiya suverinitetini himoya qilishga va‘da berdi”, deya yozadi gazeta.
Gazetaning yozishicha, prezident Putin bilan sobiq moliya vaziri va hozirda iqtisodiy maslahatchi Kudrin o‘rtasidagi munozaralar prezidentga qarashli iqtisodiy ishlar kengashi yig‘ilishida bo‘lib o‘tgan.
O‘z navbatida Rossiya Prezidentining matbuot vakili Dmitriy Peskov “Vedomosti” gazetasida chiqqan maqolani tasdiqlash yoki rad qilishdan o‘zini olib qochdi. Kengash yig‘ilishidagi munozaralar yopiq eshiklar ortida bo‘lib o‘tganligini qayd etgan Peskov xalqaro maydonda konstruktiv pozitsiya olish uchun Putinga maslahat berishning hojati yo‘qligini qo‘shimcha qildi.
“Prezident bunday maslahatsiz ham ixtiloflarni hal qilish, hamkorlikni chuqurlashtirish va xavfsizlikni mustahkamlashga qaratilgan izchil siyosatni amalda bajarib kelmoqda. Buni bila turib, xalqaro ishlarda konstruktiv pozitsiya tutish zarurligi haqida prezidentga maslahat berishning keragi yo‘q”, dedi Peskov.
