Xitoy hukumati 1949- yili Sharqiy Turkistonni bosib olganidan so‘ng uyg‘ur millatiga mansub musulmonlarni millat sifatida yo‘q qilish va Islom aqidasidan qaytarish uchun o‘z imkoniyatidagi barcha vositalarni ishga solib kelmoqda.
Xudosiz kommunistik hukumat tomonidan ilgari surilgan “bir oila – bir farzand” siyosati asosan uyg‘ur musulmonlariga nisbatan shafqatsizlarcha tatbiq qilinishi natijasida Xitoy bosqiniga qadar 25 milliondan ziyod bo‘lgan uyg‘ur musulmonlari bugungi kunga kelib 15 millionga tushib qoldi. Ammo shu bilan ham kifoyalanmagan hukumat 2014- yilga kelib xan millati vakili bilan turmush qurgan uyg‘urlarga 1,6 ming dollar berilishi to‘g‘risida qonun ishlab chiqdi. Bundan ko‘zlangan maqsad esa uyg‘urlarni millat sifatida yo‘q qilishga qaratilgan edi.
Bundan tashqari, Islom diniga muhabbati kuchli va uning hukmlariga qattiq amal qiluvchi uyg‘urlarni o‘z e‘tiqodlaridan qaytarish uchun musulmonlarga qarshi ayovsiz kurashini davom ettirib kelmoqda. Ramazon oyida ishchi-xizmatchilar, ta‘tildagi kadrlar hamda o‘qituvchi va o‘quvchilarning ro‘za tutishini taqiqladi. Masjid imomlarini esa shaharning bosh maydonida raqs tushishga majbur qilib, ularni Islom an‘analari va ta‘limotini targ‘ib qilmaslik haqida qasam ichishga majbur qildi. Erkaklarga saqol qo‘yish, ayollarga hijoblanish va bolalarga Islom asoslarini o‘rgatish taqiqlab qo‘yildi.
Faqat shu bilan kifoyalanib qolmagan rasmiy hukumat o‘lkaning musulmon tub aholisini boshqa joylarga ko‘chirish va xitoylik xanlarni bu o‘lkaga ko‘chirib kelish siyosatini olib bormoqda. Buni “qashshoqlikni tugatish” bahonasi bilan oqlamoqchi bo‘lyapti.
“Sinьxua” nashrining xabar qilishicha, 2016- yilda 26 ming kishi viloyatining qashshoq tumanlaridan boshqa hududlarga ko‘chiriladi. Buning uchun 1,5 milliard yuan ($230 mln.) ajratiladi.
