Suriya muxolifati bosh shtab boshqarmasining raisi Ahmad Berri Raqqada va Halab shimolida sodir bo‘lgan hodisalar haqida Turkiyaning “Yeni Şafak” gazetasiga intervьyu berar ekan, AQSh prezidenti Barak Obama ma‘muriyatini Suriya muxolifatiga xiyonat qilganlikda aybladi. Berri millionlab odamlar boshidan kechirgan falokatga befarq bo‘lgan AQSh ma‘muriyati kommunist, separatist 15 ming PYD (Suriya xalq demokratik partiyasi) uchun barcha imkoniyatlarni safarbar qilayotganligiga diqqatni jalb qildi. Uning ta‘kidlashicha, Suriyada yuz minglagan insonlarning qirg‘in qilinishiga tomoshabin bo‘lib turgan Obama ma‘muriyati 15 ming Xudosiz PYDchilar uchun jon kuydirmoqda.
“6 yillik jang davomida qonxo‘r Asad rejimi, Eron va Rossiya kuchlari tarafidan 500 mingdan ziyod odamimiz o‘ldirildi. 20 million Suriyaliklar uchun pinagini buzmagan Obama ma‘muriyati so‘nggi kunlardagi hatti-harakatlari bilan bizga xiyonat qildi”, dedi Ahmad Berri.
Muxolifat qo‘mondoni Suriya xalqi kelajagi haqida gapirar ekan, “tinchliksevarlikni” da‘vo qilgan AQSh prezidenti Barak Obama PYDga davlat tiklab berish uchun sa‘y-harakatlar olib borayotganligini ham tilga olib o‘tdi.
“AQSh esa sotsialistik dunyoqarashga ega, Islomning dushmani bo‘lgan PYD uchun jangga kirdi. Maydonda barcha taraflar sunniy Musulmonlarga qarshi birlashmoqda. millionlab Sunniylarning ahvoli kundan-kunga qiyinlashib boryapti. Qirg‘in qilinganlar, mamlakatni tark etayotganlar, mayib-majruh bo‘lib qolayotganlar, afsuski, Suriyaning sunniy aholisidir. Ahvol shunday davom etsa, Suriyada Sunniy musulmonlarga nisbatan yana ham katta qirg‘inlar va surgunlar sodir etilishi mumkin”, dedi Berri.
Muxolifat qo‘mondoni Ahmad Berrining olg‘a surishicha, IShID tashkiloti bilan PYDning orqasida bitta kuch turibdi. PYD Raqqa shahriga hujum boshlaganda IShID unga qarshilik ko‘rsatish o‘rniga Azez va Maraga hujum boshladi. Bu esa har ikki terrorchi tashkilotni ham bitta aql boshqarayotganligini ko‘rsatadi.
“Barchaga ma‘lum bo‘lganidek, IShIDning mintaqadagi yagona tashvishi PYD kurd davlatiga yo‘l ochishdir. Hatto qo‘lda tutib qolish mumkin emasligini bilib tursa ham, ba‘zi mintaqalarga hujum qilmoqda”, deya qo‘shimcha qildi Berri.
