Zamonaviy fir‘avnlardan biri, Tojikiston tog‘uti Imomali Rahmon Islom dini va musulmonlarga qarshi kurash, islomiy ko‘rinish va qadriyatlarni jamiyatdan surib chiqarish uchun o‘z imkoniyatidagi barcha vositalarni ishga solib kelmoqda.
Mamlakatda 1992-1997 yillar mobaynida davom etgan fuqarolar urushidan so‘ng hokimiyat tepasiga kelgan Imomali Rahmon o‘z rejimini mustahkamlash uchun mamlakatning 95 foizidan ziyodini tashkil etuvchi musulmonlar xohish-istaklari va tuyg‘ulari bilan hisoblashish o‘rniga, AQSh tomonidan mustabid tuzumlar uchun bayroq sifatida ko‘tarilgan “terrorizm” va “ekstremizm”ga qarshi kurashni dastak qilib oldi.
Maktab-Oliy o‘quv yurtlari o‘quvchi va talaba qizlarning ro‘mollari, 18 yoshga to‘lmagan bolalarni masjidlarga kirishini taqiqlash o‘zining “ijobiy” samarasini bergach, musulmon erkaklarning saqol va oq do‘pillarini “tartibga” solishga kirishib ketdi. Kuch organ xodimlari tomonidan ko‘cha-kuyda ushlangan musulmonlarning saqollarini majburan qirib tashlash odatiy ishga aylanib qoldi.
Imomali Rahmon prezidentligi davrida yuqori darajaga yetgan ishsizlik, keng quloch yoygan poraxo‘rlik, qashshoqlik va kuch ishlatar tizimlarining bedodligini bartaraf qilish o‘rniga, “tojiklarning milliy madaniyatiga begona” bo‘lgan muslima ayollarning ust-boshlariga qarshi kurashni boshlab yuborildi va prezident ko‘rsatmasi asosida asosiy e‘tibor ayollarning jamoatchilik joylarida avratlari yopiq holda yurishlarini oldini olishga qaratildi. O‘z tug‘yonida chuqurlashib borayotgan prezident hatto chaqaloqlarga islomiy ismlar qo‘yilishini taqiqlovchi qonun ishlab chiqilishi va qabul qilinishida bosh-qosh bo‘ldi.
Rozilikni Alloh xuzuridan emas, balki bandasi xuzuridan istayotgan amaldorlar esa Islom va musulmonlarga qarshi kurashda Imomali Rahmonga “qo‘sh qanot” bo‘lib kelishmoqda. Tojikiston hukumati qoshidagi ayol va oila qo‘mitasi boshlig‘i Idigul Qosimzoda 25 may kuni turli vazirlik va idora vakillari, ichki ishlar va milliy xavfsizlik xodimlari bilan bo‘lgan uchrashuvda ayollarning kiyinish usulini qattiq nazorat ostiga olish zarurligini belgilab o‘tdi. Bu masala Tursinzoda shahri va Rudakiy tumani hokimlari, muassasa direktorlari, bozor va savdo markazlari rahbarlari bilan uchrashuv vaqtida ham ko‘tarildi.
“Ushbu uchrashuvlardan asosiy maqsad milliy liboslarni targ‘ib qilish, qiz-juvonlar tomonidan kiyinish madaniyatiga rioya qilishni tushintirishdan iborat”, deyiladi qo‘mita xabarida.
Uchrashuvlarda Qosimzoda “begona madaniyat”ni targ‘ib qiluvchi kiyimlar ishlab chiqarishni cheklash bo‘yicha kerakli choralar ko‘rish zarurligini ta‘kidlab o‘tib, bozor va savdo markazlari rahbarlaridan ayol xodimalari liboslariga e‘tibor qaratishni topshirdi.
