Britaniya bosh vaziri Devid Kemeron Turkiyaning yaqin yillarda Yevropa Ittifoqi hamjamiyatiga a‘zo bo‘lib kirish imkoniyati yo‘qligini ta‘kidladi. Kameronning izohlashicha, hozirgi holatni hisobga olganda Turkiyaning Yevropa Ittifoqiga a‘zoligi 3000 yildan so‘ng ro‘yobga chiqishi mumkin.
“Turkiyaning Yevropa Ittifoqiga a‘zo bo‘lishi ehtimoldan ancha yiroq. Shu ketishida bo‘lsa, hatto “ehtimoli”ni belgilash uchun ham o‘nlab yillar o‘tadi”, “Ular 1987 yilda murojaat qilishgan edi. Bugungi ilgarilashiga qaraganda, ularning Yevropa Ittifoqiga kirishi so‘nggi taxminlarga ko‘ra, ehtimol bu 3000 yilga to‘g‘ri kelishi mumkin”, dedi Britaniya bosh vaziri Devid Kemeron.
“ITV” televideniyesi tarafidan tashkil qilingan teledasturga ishtirok etgan Kemeron Britaniyaning Yevropa Ittifoqidan ajrab chiqishi uchun kampaniya olib borayotganlarga nisbatan qarshi fikr bildirdi. Kemeronga ko‘ra, ularning Britaniya xalqiga qarata “Biz Turkiyaning Yevropa Ittifoqiga a‘zo bo‘lishiga to‘sqinlik qila olmaymiz. Shu sababli bizning Yevropa Ittifoqidan chiqishimiz uchun ovoz bering”, degan chaqirig‘i voqelikni aks ettira olmaydi. Shuningdek Kameron barcha Yevropa Ittifoqiga a‘zo davlatlar qatorida Angliyaning ham Yevropa Ittifoqiga a‘zo bo‘lishga intilgan har qanday davlatga nisbatan veto qo‘yish huquqi borligini aytib o‘tdi.
Turkiya NATO ittifoqining a‘zosidir. 1996 yildan buyon Yevropa Ittifoqi bilan bir qatorda, bojxona ittifoqiga a‘zo davlatlardan biri hisoblanadi. 1987 yildan buyon Yevropa Ittifoqiga a‘zo bo‘lish ishqida yongan bu davlat, 1999 yilda nomzod maqomini qo‘lga kiritgan. Kelishuvga ko‘ra, Turkiya YeIga a‘zo bo‘lishi uchun uning 72ta talabini bajarishi shart.
