Turkiya bosh vaziri Ahmad Dovudo’g’li ikki kunlik ish safari bilan Qozog’istonga keldi. Tashrif davomida Dovudo’g’liga Turkiyaning transport, kemasozlik va kommunikatsiya vaziri Binali Yildirim hamrohlik qiladi.
Qozog’iston prezidenti matbuot xizmatining xabar qilishicha, Ahmad Dovudo’g’li Nazarboev bilan savdo, energetika sohasida hamkorlik hamda xalqaro va mintaqaviy masalalarni muhokama qilishi kutilmoqda.
Hozirda Turkiya investitsiya almashinuvi bo’yicha (2 mlrd. dollar) Qozog’istonning AQSh, Janubiy Koreya va Buyuk Britaniyadan keyin to’rtinchi o’rinda turuvchi asosiy hamkori sanaladi.
Bundan tashqari, Qozog’istonda 1800ga yaqin turk kompaniyasi faoliyat olib bormoqda. Qozog’istondagi turk pudratchilari loyihalarining umumiy qiymati 17,5 milliard dollariga yaqinni tashkil etadi.
So’ng yillarda ikki davlat o’rtasidagi tovar ayriboshlash hajmi ikki barobarga ortib, 2 milliarddan 4 milliard AQSh dollariga etdi. “Yangi hamkorlik” dasturlari doirasida ikki davlat boshliqlari bu ko’rsatkichni 10 milliard AQSh dollariga olib chiqishga kelishib olishgan edi.
