Tolibon delegatsiyasi Qatar davlatining poytaxti Dohada Afg’oniston Oliy tinchlik Kengashi a’zolari bilan dastlabki uchrashuvni amalga oshirdi. Uchrashuvda 14-yillik AQSh bosqini va fuqarolik urushiga yakun yasash ko’zda tutilgan rasmiy tinchlik muzokaralarini boshlash uchun Tolibon harakati o’zining shartlarini e’lon qildi. Tolibon voizi Zabihullah Mujohid muzokara boshlanishidan avval Tolibon harakati «xalqaro terrorizm» ro’yxatidan olib tashlanishini talab qildi.
“Har qanday rasmiy tinchlik muzokaralari o’tkazilishi uchun bizning mujohidlarimiz AQSh va BMTning terrorizm ro’yxatidan olib tashlanishi va ularni qo’lga olganlar uchun va’da qilingan mukofotlar bekor qilinishi lozim”, dedi Tolibon harakatining voizi Zabihulloh Mujohid.
2013 yilda Qatar poytaxti Dohada ochilgandan so’ng ba’zi sabablarga ko’ra qayta yopilgan Tolibon siyosiy byurosining yangidan ochilishini ham talab qilgan Zabihulloh hozirga qadar o’tkazilgan uchrashuvlarga «ijobiy» baho berdi.
“Shu kungacha bir necha marotaba va bir qancha nuqtalarda kelisha oldik, deb aytishim mumkin. Birinchi o’rinda barcha xorijiy qo’shinlar olib chiqiladi. Ammo bu qanday amalga oshirilishi haqida hanuzgacha kelishilmadi”, dedi Tolibon voizi “AFP” axborot agentligiga bergan intervyusida.
“Xususan mustaqil islomiy rejim tashkil qilish borasida barchaning fikri bir xildir. Ayniqsa, ishtirokchilarning ko’pchiligi rejimning nomi “Afg’oniston Islom Amirligi” bo’lishidan rozidirlar”, deya qo’shimcha qildi Voiz.
Oliy Tinchlik Kengashi safida Afg’on hukumati tarafidan vakil sifatida yig’ilishga ishtirok etayotgan Aminuddin Muzaffariy esa Tolibon harakatining talab va shartlariga nisbatan biroz tanqidiy ma’noda fikr bildirdi.
“Har qanday talab va shartlar kelishuv muddatining kechikishiga sabab bo’lmoqda”, dedi u “AFP” axborot agentligiga bergan intervyusida.
Muzokaralar xalqaro “Pugwash Conferences” deb nomlangan guruh boshchiligida olib borilmoqda. “Pugwash” rahbari Paolo Cotta-Ramusino Afg’onistonning muammolariga harbiy uslub echim bo’lmasligini ta’kidladi.
