Qirg’iziston hukumati Rossiya bosimi ostida mamlakatni Yevroosiyo iqtisodiy ittifoqiga olib kirgunga qadar “Qirg’iziston uchun 170 million kishilik bozor ochilishi va investitsiya muhiti yaxshilanishi” haqida tinmay gapirib, xalqning qo’ynini puch yong’oq bilan to’ldirib keldi. Mana Qirg’iziston YeOIIga a’zo bo’lib kirganiga ham yarim yil bo’lib qoldi. O’tgan vaqt mobaynida esa Qirg’iziston iqtisodi bu a’zolikdan ko’rgani zarardan boshqa narsa bo’lmayapti.
Avvalambor rasmiy hukumat aytganidek, Qirg’iziston uchun 170 million kishilik bozor ochilishi o’rniga Rossiya uchun orzon ishchi kuchi bozori yanada kengaydi. Chunki, Markaziy Osiyoda eng yirik ulgurji bozorlar bo’lgan “Do’rdoy” va “Qarasuv” bozorlaridagi savdo xajmi 70-80 foizga tushib ketishi natijasida bu bozorlarda tirikchilik qilib kelgan minglab odamlar Rossiyadagi mehnat muhojirlari safiga borib qo’shilishga majbur bo’ldilar. Mazkur bozorlarda savdo hajmining tushib ketishi esa o’z navbatida qo’shni Qozog’iston bilan savdo aylanmasini kamayib ketishiga olib keldi. Bunga asosiy sabab esa, Qirg’iziston Qozog’istonga asosan Xitoydan olib kelingan tovarlarni reeksport qilib kelar edi.
Qirg’iziston davlat bojxona xizmati bergan ma’lumotlarga ko’ra, o’tgan 2015 yilning 11 oyi mobaynida Qirg’iziston va Qozog’iston o’rtasida savdo hajmi 1,8 borobarga kamayib ketdi. O’tgan yilning 11 oyi mobaynida ikki davlat o’rtasidagi savdo hajmi 472 million 691 ming dollarni tashkil etgan bo’lsa, 2014 yilning shu vaqti mobaynida esa bu ko’rsatkich 858 million 509 ming dollarni tashkil etgan edi.
Qozog’istondan import qilinadigan maxsulotlar miqdori ayni davrga solishtirganda 518 million 117 ming dollardan 321 million 991 ming dollarga tushib ketgan bo’lsa, eksport hajmi esa, 340 million 392 ming dollardan 150 million 700 ming dollarga tushib qoldi.
