Qirg’iziston hukumati matbuot xizmatining xabar qilishicha, bosh vazir Temir Sariev boshchilik qilayotgan delegatsiya 14 dekabr kuni Xitoyning Chjenchjou shahriga etib borgan. Temir Sariev bu erda 15 dekabr kuni bo’lib o’tadigan Shanxay hamkorlik tashkilotiga a’zo mamlakatlar hukumat rahbarlari (bosh vazirlar) kengashining 14-majlisida ishtirok etadi.
Bundan tashqari Temir Sariev XXR rahbariyati bilan ham uchrashuv o’tkazadi.
“Sarievning tashrifi XXR Davlat Kengashi bosh vaziri Li Ketsyanning taklifiga ko’ra amalga oshiriladi. Muzokaralar yakunlariga ko’ra hamkorlik bo’yicha bir qator hujjatlarning imzolanishi kutilmoqda”, – deyiladi xabarda.
17 dekabrga qadar davom etadigan safar doirasida Temir Sariev xalqaro internet-konferentsiya va Qirg’iziston-Xitoy investitsion forumida ishtirok etishi ham rejalashtirilgan.
