Cho’kayotgan qayiqqa chiqqan odam najot topmaganidek, Rossiya tashabbusi bilan tashkil etilgan Yevroosiyo iqtisodiy ittifoqiga a’zo bo’lgan Qozog’iston iqtisodidagi inqirozlar ham kundan-kunga kuchayib bormoqda. Bu inqirozni oldini olish va byudjetdagi kamomadni o’rnini to’ldirish uchun esa qozoq hukumati tejamkorlik siyosatini qo’llashga majbur bo’lmoqda.
23 noyabr kuni Ostona shahrida bo’lib o’tgan hukumatning kengaytirilgan yig’ilishida Qozog’iston prezidenti Nursulton Nazarboev yig’ilganlarni qozog’istonliklarni qanday qilib “belbog’larini tortish”, ya’ni mablag’larni tejash choralari haqida o’ylab ko’rishga chaqirdi.
Nazarboevning so’zlariga ko’ra, qozoq bozori Rossiyaga qarshi qo’llangan jazo choralaridan ziyon ko’rgani kabi, rubl kursini tushib ketishidan ham ziyon ko’rmoqda. Rossiya Markaziy banki ortidan Qozog’iston ham tanga kursini erkin qo’yib yuborishga majbur bo’ldi, bu esa o’z navbatida sarf-harajatlarni ortishiga olib keldi.
Rossiyadan Qozog’iston bozorlariga ko’p miqdorda avtomobil etkazib berilishi qozoq avtomobilsozligiga qattiq zarba bo’ldi. Shu munosabat bilan Nazarboev ogohlantirib, “Axir bizlarda YeOII va u bizlarga ziyon etkazmasligi kerak. Ayni shunday sharoitda Yevropa ittifoqidagi ayrim davlatlarda chegaralarni yopish haqida gap-so’zlar paydo bo’ladi. Ya’ni, davlat manfaatlari, har qaysi mamlakatning iqtisodi barcha narsadan muhim hisoblanadi. Buni yodda tutishimiz darkor”, – dedi.
Bu muammolardan qutulish uchun Nazarboev aholini mahalliy mahsulotlarni sotib olishga targ’ib qilmoqda. Olmaota shahrida tashkillashtirilgan o’rta va yirik engil sanoat korxonalari ko’rgazmasi bilan tanishgan Nazarboev aholi tomonidan mahalliy ishlab chiqarishni qo’llab-quvvatlash muhimligini belgilab o’tdi.
“Men barcha qozog’istonliklarga mahalliy mahsulotlarni, jumladan, “made in Kazakhstan” belgili poyafzal va kostyumlarni sotib olishlarini aytishni xohlar edim. Agar engil sanoat mahsulotlariga talab oshib boradigan bo’lsa sohada ishlayotgan odamlar ish haqi olishadi, davlatga soliq to’lashadi. Bu barcha uchun foydali, byudjet daromadi oshadi, mamlakatda mahalliy mahsulotlar paydo bo’ladi”, – dedi Nazarboev.
