Misrning xunta prezidenti Abdulfattoh as-Sisi sobiq prezident Muhammad Mursiy boshchiligidagi “Musulmon birodarlar” harakatini hokimiyatdan chetlatib, terroristik tashkilot deya e’lon qilgan va barcha a’zolarini qamoqqa tashlagan edi. Biroq bugunga kelib ularga nisbatan yashil chiroqni yoqadigan yumshoq gaplarni ayta boshladi.
Londonga qilgan safari chog’ida BBS televideniyasiga intervyu bergan as-Sisi agar Misr halqi talab qiladigan bo’lsa, terroristik tashkilot deb e’lon qilingan harakat jamiyat hayotida takror rol o’ynashi mumkinligini bildirdi.
“Bu mavzu hukumatga yoki menga bog’liq emas. Balki Misr jamiyati, xalqiga bog’liq. Misrliklar tinchlikparvar insonlardir, zo’ravonlikni yomon ko’rishadi. “Musulmon birodarlar”ga qarshi reaktsiya bildirishdi. Chunki ulardan xavotirda edilar. Bu davlat hammamizga etadigan darajada buyuk. Ular ham Misrning bir parchasidir. Shunday ekan, ularning qanday rol o’ynashlari borasida Misr xalqi qaror qiladi”, dedi Misr prezidenti.
Ayni paytda Misrda “Musulmon birodarlar” harakatining 18 nafar etakchisi davlat mahkamasi qaroriga binoan qora ro’yxatdan chiqarildi. Ular orasida harakatning murshidi Muhammad Badi’ ham bor. Almesryoon.com sayti davlat mahkamasida ishlaydigan mutaxassisga tayanib xabar qilishicha, mahkamaning mazkur qaroridan so’ng “Musulmon birodarlar” harakati o’zining siyosiy faoliyatini yangidan boshlashi mumkin.
Qohirada joylashgan siyosiy va huquqiy tadqiqotlar markazining rahbari Ahmad Mihran ham mahkamaning qarorini ijobiy baholadi. Mihranning bildirishicha, “Musulmon birodarlar” mahkamaning qaroriga bilan qonuniy holga kelgan va u endi yana siyosiy hayotini qayta boshlashi mumkin.
Shuni ham eslatib o’tish lozimki, Mursiy taxtdan qulatilganidan so’ng “Musulmon birodarlar” harakatining juda ko’p a’zolari terrorchilikda ayblanib qamoqqa olindi. Ulardan aksariyati qamoqxonalarda qiynoqlar ostida jon taslim qildi. Markazi Jenevada joylashgan inson huquqlari tashkiloti tarafidan e’lon qilingan hisobotga ko’ra, Misrdagi turli qamoqxonalarda 2013 yil avgust oyidan 2015 yil sentyabr oyigacha 323 kishi hayotdan ko’z yumgan. Bulardan 121 nafari qiynoqqa solish, meditsina yordamidan mahrum qilish va yomon sharoitlar tufayli hayotdan ko’z yumganligi aniqlangan.
