Tojikistonda davlat xizmatchilariga juma namozini ado etish uchun masjidga borish man qilindi. Bu haqida “Aziya-Plyus” nashriga bir nechta davlat xizmatchilari xabar berishgan. Ularning aytishicha, avvallari juma namozini ado etish uchun hech qanday to’siq bo’lmagan.
“Ammo oxirgi ikki haftada, Qurbon hayitidan so’ng rahbariyatimiz bizlarga ish vaqtida juma namoziga borishimizni ta’qiqlab qo’ydi”, – dedi davlat xizmatchilaridan biri.
Tojikiston hukumati qoshidagi din ishlari, milliy an’ana, to’y va marosimlarni tartibga solish qo’mitasidagi “AP” manbasi ham bu xabarni tasdiqladi.
Manbaning so’zlariga ko’ra, juma namozi vaqtida qo’mita xodimlari masjidlarga taqsimlanib, “bola tarbiyasida ota-onaning javobgarligi to’g’risida”gi qaror qanday ijro etilayotganini nazorat qilishmoqda. Mazkur qarorga muvofiq 18 yoshga to’lmagan yoshlar masjidga kelishi ta’qiqlangan.
Qo’mitadagi manbaning ta’kidlashicha, ammo boshqa davlat xizmatchilari ish vaqtida ish joylarida bo’lishlari kerak.
