AQSh prezidenti Barak Obama “CBS” telekanali orqali chiqish qilib, Amerikaning Suriya inqorozi borasidagi pozitsiyasini ma’lum qildi. Obamaga ko’ra, AQSh o’tmishda Afg’oniston va Iroq kabi davlatlarga askar yuborib xatoga yo’l qo’ygan. Shuning uchun hozirda AQShning Suriyaga askar yuborish ehtimoli yo’q. O’z kuchini namoyish qilish uchun Suriya, Yaman, Liviya kabi davlatlarga askar yuborish lozimligini bildirayotganlar xato yo’lda ekanligini ta’kidlagan Obama “Bu xato strotegiyadir. Yana o’tmishdagi xatomizni takrorlasak, holimizga voy bo’lsin”, dedi.
Turkiya, Saudiya Arabistoni va Iordanida olib borilayotgan “Suriya mu’tadil muxolifatini harbiy mashg’ulotdan o’tkazish” rejasi barbod bo’lgandan so’ng, endilikda IShIDga qarshi qanday kurash olib boriladi, degan savolga AQSh prezidenti Suriya va Iroqda sunniy musulmonlarga tayanishini bildirdi.
“Barcha millatlar hamkorlikda vaqt o’tishi bilan ulardan qutiladi. Biz bunga boshchilik qilamiz. Ammo Suriya ichida va Iroqning ba’zi erlarida mahalliy sunniy xalqlar biz bilan hamkorlikda faoliyat olib bormaydigan bo’lsa, ulardan qutila olmaymiz”, dedi Barak Obama.
Eng avvalo Amerika xalqining xavfsizligini himoya qilish lozimligini ta’kidlagan Obama besh yildan buyon vayronaga aylangan Suriyadan AQShga qanday xavf kelishi haqida to’xtalmadi. Uning qayd etishicha, Suriya mu’tadil muxolifatini dastaklash va muvaqqat hukumat tashkil qilish uchun Rossiya va Eronni Asadga bosim o’tkazishga ko’ndirish lozim.
“Suriyadagi vaziyat shunchalik nozik bir paytda qo’limizda sehrli tayoqcha yo’q”, deya qo’shimcha qildi u.
