Ukraina bosh vaziri Arseniy Yatsenyuk bergan bayonotga ko’ra, vazirlar mahkamasi ishlab chiqilgan yangi harbiy doktrina loyihasida Rossiyani asosiy potentsial dushman sifatida ko’rsatib o’tgan.
“Ukraina mustaqiligining tarixida birinchi marta harbiy doktrinada dushmanlar va agressorlar ko’rsatildi. Bu Rossiyadir”, – dedi u Odessada bo’lib o’tgan brifingdagi chiqishi chog’ida.
Uning ta’kidlashicha, doktrina loyihasi mudofaa va milliy xavfsizlik kengashiga yuborildi. Endilikda uni Ukraina prezidenti o’z farmoni bilan tasdiqlashi kutilmoqda. Ilgariroq Ukraina Oliy Radasi Rossiyani agressor mamlakat deb tan olish haqidagi bayonotni ma’qullagani xabar qilingan edi.
Rada boshqa davlatlar parlamentlarini va xalqaro tashkilotlarni Rossiyaga bo’lgan bosimni kuchaytirishga chaqirdi. Shuningdek, parlament tan olinmagan Lugansk va Donetsk “respublika”larini terrorchi tashkilotlar deb tan olish joizligini e’tirof etdi.
