Xitoy markaziy banki ba’zi mintaqalarda AQSh dollarining o’rniga Rossiya rublini muomalaga kirita boshladi. Xitoyning Suyfenxe shahrida markaziy bank yuan bilan bir qatorda rublni muomalaga kiritish haqida qaror qabul qildi. Yangi boshlangan faoliyat tajribasiga ko’ra, Rossiya rubli Amerika dollarining o’rnini egallay olishi aytilmoqda.
Xitoy iqtisodiyot vazirligining bosh kotibi Jin Mey rasmiy bayonot berib, rus rublining amalda qo’llanishi Xitoyning Rossiya bilan bo’lgan tijoriy va turizm aloqalarini kuchaytirishga qaratilganligini ma’lum qildi. Bayonotda aytilishicha ikki davlat o’rtasidagi o’zaro iqtisodiy aloqalar hajmi o’tgan yil 1,32 milliard dollarga etgan. Shuningdek bayonotga ko’ra, dollar o’rniga rubldan foydalanish uzoq muddat juda foydali natijalar olib kelishi rejalashtirilgan. Shunga ko’ra, savdo markazlari, mehmonxonalar va restoranlar kabi barcha jamoatchilik joylarida rubl bilan muomala qilish mumkin bo’ladi.
Esga olib o’tish joizki, 2014 yilda Rossiya va Xitoy o’rtasida 150 milliard dollar qiymatiga teng yuan almashtirish bitimi imzolangan edi. Bu esa Ukraina inqirozi tufayli iqtisodiy jihatdan og’ir vaziyatga tushib qolgan Rossiya uchun yangi “eshik” vazifasini o’tagan edi.
