Suriyalik mo”tadil muxolifat vakillarini harbiy mashqdan o’tkazish loyihasidan ko’zlangan maqsad ro’yobga chiqmay qoldi. Bu haqida harbiy mashqdan o’tkazish loyihasi ustidan mas’ul shaxs suriyalik polkovnik Nedim Hasan ma’lum qildi. Nedim Hasanga ko’ra, avvalda 5000 kishini harbiy mashqdan o’tkazish rejalashtirilgan. Ammo bu raqam 54 kishining mashqdan o’tishi bilan nihoyasiga etgan.
“Ilk loyihada bizdan 5000 kishilik nomzodlar ro’yxatini talab qilishdi. Darhol Suriya ichida ishga kirishdik. Qisqa vaqt ichida 3500 kishining ro’yxatini tuzib AQShlik mas’ullarga topshirdik. Bu ro’yxatda keltirilganlardan 800 kishining mashqdan o’tishga tayyor turishi talab qilindi. So’ngra o’zlari olib borgan tergovlar natijasida bu raqam 350 taga kamaytirilganligini aytishdi. Buning ortidan faqat 154 kishi harbiy mashqni davom ettirishdi. Bularning 100 nafari Iordaniyada, 54 nafari esa Turkiyada mashqdan o’tayotgan edi. Iordaniyadagi lagerda mashqdan o’tayotgan 100 kishi AQShliklar tarafidan ma’qul ko’rilmaganligi uchun muddatidan avval harbiy mashq to’xtatilib, ular Suriyaga qaytarib yuborildi. Turkiyadagi 54 kishi harbiy mashqni to’liq tamomlab 2015 yilning iyul oyida Suriyaga yo’l oldi. Shuni aytib qo’yish lozimki, shu kungacha (8 oy mobaynida) bor yo’g’i 54 askarimiz harbiy mashqdan o’tdi xolos”, dedi Nedim Hasan.
Keyingi olingan xabarga ko’ra, mana shu 54 kishidan 18 tasi mujohidlarning qo’liga asir tushgan. Suriya turkman milliy harakat partiyasi rahbarining yordamchisi Toriq Jevizchining aytishicha, AQSh nazorati ostida harbiy mashqdan o’tgan 18 nafar muxolifatchi Jabhatun Nusra guruhi tomonidan ko’lga olingan. Ularning orasida yuqoridagi ma’lumotlarni bergan Nedim Hasan ham bor.
Bu hodisadan biroz o’tib, ulardan yana 8 kishi qo’lga olindi. Ishonchli manbalardan olingan xabarlarga ko’ra, harbiy mashqdan o’tgan muxolifatchilar bilan Jabhatun Nusra guruhi o’rtasida bo’lib o’tgan jangda muxolifatchilardan 5 tasi o’ldirilgan, 16 tasi yaralangan va yana 8 tasi qo’lga olingan. Endi harbiy mashqdan o’tgan 54 askardan qanchasi qolganligini o’zingiz hisoblab ko’ravering.
