Turkiya tashqi ishlar vazirining maslahatchisi Faridun Sinirlio’g’li Italiya poytaxti Rimda Isroil tashqi ishlar vazirligining bosh direktori Dore Gold bilan maxfiy uchrashuv o’tkazgani aytilmoqda. Bu haqida Isroilning mashhur gazetalaridan biri “Gaarets” gazetasi o’zining elektron saytida xabar tarqatdi. Maxfiy uchrashuv Turkiyadagi saylovlardan so’ng bo’lib o’tganligini yozgan gazetaning elektron saytida uchrashuvga oid batafsil ma’lumot tarqatilmadi.
Gazetaning yozishicha, Turkiyada Isroillik mas’ullar haqida yuritilayotgan da’volar Turk parlamenti chiqaradigan bir qonun bilan tugatilishi va ikki davlat o’rtasidagi aloqalarning barqarorlashuvi borasida ham bitimlar tuzilgan.
Fotojurnalistlar uyushmasi kengash a’zolari bilan uchrashuv o’tkazgan Turkiya tashqi ishlar vaziri Mavlut Chuvasho’g’li Turkiya va Isroil o’rtasida o’tgan maxfiy uchrashuvni tasdiqladi.
“O’zaro aloqalar barqarorlashuvi uchun ikki davlat o’rtasida uchrashuvlar bo’lib turishi tabiiy hol. Hech uchrashmasdan, qanday qilib aloqalarni davom ettirish mumkin? Bu uchrashuvlar endi bo’layotgan ish emas. Tarixdan buyon bu ikki davlat ekspertlar darajasida uchrashib kelmoqda. Bir sohada bitim tuzdik. Ammo biz istagan ikki sohada (ya’ni Movi Marmara hodisasida o’ldirilganlar oilasiga tovon to’lash va G’azo mintaqasining qamal qilinishini to’xtatish sohasida) koptok qarshi tarafda. Biz ulardan javob kutyapmiz”, dedi Turkiya tashqi ishlar vaziri.
