Tojikiston prezidenti Emomali Rahmonov yozning issiq kunlariga to’g’ri kelgan ramazon oyida og’ir ish qiladigan ishchilar ro’za tutmasligi mumkinligini bildirdi. Buning uchun u Tojikiston davlat ulamolari kengashidan fatvo chiqarib berishni so’radi.
Emomali Rahmonov davlat televideniyasi orqali chiqishida ramazon oyi fazilat, ibodat va rahmat oyi ekanligini eslatib, insonlarni sabrga, saxiylikka va kelajakka umid bog’lashga chaqirdi. Rahmonov o’zining so’zlariga Baqara surasining 185 oyatini ilova qilar ekan, safarda bo’lgan yoki kasalmand bo’lgan yoxud nogiron bo’lgan kishilar ro’za tutishni kechiktirish mumkinligini aytib o’tdi.
Shu zaylda so’zini davom ettirgan tojik prezidenti yozning issiq kunlarida dehqonlar va ayrim og’ir ish bilan shug’ullanuvchi kishilarga ro’za tutish og’ir kelishini ta’kidlab o’tdi. Shu bois u davlat ulamolari kengashini mazkur toifadagi kishilar uchun ro’za tutmaslik joizligiga doir fatvo chiqarib berishga chaqirdi. Prezidentga ko’ra, Hanafiy mazhabida yozning issiq kunlarida og’ir mehnatkashlarga engillik mavjud. Shuning uchun qariyalar, nogironlar va kasalmandlar bilan bir qatorda dehqonlar hamda og’ir mehnat qiluvchilar ramazon ro’zasini tutmasa ham bo’laveradi.
Tojikiston prezidenti o’z murojaatida yoshlarni ham e’tibordan chetda qoldirmadi. U butun mamlakat yoshlarini “ekstrimistik” guruhlarga qo’shilib ketmaslikka chaqirdi.
