19 yil davom etgan muzokaralardan so’ng Qozog’istonda Jahon savdo tashkilotiga a’zo bo’lish imkoniyati paydo bo’ldi. Shu munosabat bilan Qozog’iston prezidenti Nursulton Nazarboev xalqqa murojaat qildi.
“Bugun Jenevada ishchi guruhning oxirgi yig’ilishi bo’lib o’tdi, unda Qozog’istonning Xalqaro savdo tashkilotiga a’zo bo’lishi borasidagi muzokaralarning yakunlangani rasman e’lon qilindi. Bu biz uchun tarixiy voqea bo’ldi. Qozog’iston tashkilotga a’zo bo’lgan 162-davlat bo’ldi. Dunyoning barcha yirik iqtisodiyotlarini Qozog’istonni yaxshi investitsion muhitga ega, savdo siyosatini xalqaro huquq me’yorlariga muvofiq olib boradigan mamlakat deb tan oldi”, – deyiladi murojaatda.
Nazarboevning fikricha, tashkilotga a’zolik mamlakat oldida yangi imkoniyatlar ochib beradi, jumladan, mahalliy ishlab chiqaruvchilar uchun tashkilotga a’zo bo’lgan barcha davlatlarning ichki bozoriga barcha eshiklar ochiladi.
O’z navbatida Jahon savdo tashkiloti vakili Melissa Begag, agar barcha yuridik rasmiyatchiliklar yakuniga etkazilsa, Qozog’iston 2015 yil oxiridayoq Jahon savdo tashkiloti (JST)ning to’la huquqli a’zosiga aylanishi mumkinligini ma’lum qildi.
Ma’lumot o’rnida, rasmiy Ostona JSTga a’zo bo’lish haqidagi arizani 1996 yil 29 yanvarda bergan edi. Oradan o’tgan 19 yillik muzokaralardan so’ng 10 iyun kuni mamlakatning tashkilotga qo’shilish shartlari haqidagi muzokaralar yakunlandi. Qozog’istonning JSTga a’zo bo’lishi bo’yicha hujjatlar paketi loyihasi tashkilot ishchi guruhiga rasman tasdiqlash uchun 22 iyun kuni topshirilishi kerak edi.
“Agar barchasi rejalashtirilganidek ketsa, unda ular yil oxiriga kelib, rasman JST a’zosiga aylanishi mumkin”, – dedi Begag 22 iyundagi majlisda ishchi guruhning barcha 52 a’zosi hujjatlar paketini ma’qullaganini aytar ekan.
Qozog’istonga 31 oktyabr kuni hujjatlarning ichki ratifikatsiyasini o’tkazish tavsiya etildi. Ratifikatsiyadan 30 kun o’tib esa, u rasman JSTning a’zosiga aylanishi mumkin.
