AQSh prezidenti Barak Obama AQShning Merilend shtatida olti ko’rfaz davlatlarining etakchilari bilan uchrashdi. Arab davlatlarining rahbarlari uchrashuvda o’zlari kutgan narsaga erishgandek bo’ldi. Chunki Kemp Devid rezdentsiyasida bo’lib o’tgan uchrashuvda AQSh hukumati Ko’rfaz davlatlarini tashqi xavf xatarlardan himoya qilish kafilligini o’z zimmasiga olganligi haqida bayonotlar yangradi. Bayonotda aytilishicha, AQSh Ko’rfaz davlatlaridan iborat ittifoqdoshlaridan aslo voz kechmaydi.
Ko’rfaz mintaqasida AQShning kuchli harbiy bazasi mavjudligini tilga olgan Prezident Obama agar arab ittifoqdoshlarini tashqi hujumlardan himoya qilish uchun harbiy kuch ishlatishga to’g’ri kelsa Pentagon bunga tayyorligini bildirdi.
Prezident Obama ko’rfaz davlatlari AQShning mintaqadagi eng yaqin ittifoqdoshi ekanligini va Saudiya qiroli Salmon bin Abdulazizni juda hurmat qilishini ta’kidlar ekan, arab davlatlarini tashqi hujumlardan himoya qilish AQSh hukumatining zimmasida ekanligini aytib o’tdi.
“Bu davlatlar tashqi xatar bilan yuzlashgan taqdirda Qo’shma Shtatlar yordamga keladi. Mintaqadagi muammolarga echim topishda hamkorlikni yanada kuchaytiramiz”, “Ko’rfaz davlatlarining xavfsizligi doim muhofaza qilinishi lozim. O’zaro bitimda ko’rsatilganidek, bu o’lkalarning hududiy barqarorligiga tahdid soluvchi har qanday xatarga qarshi AQSh ular bilan hamkorlik qilishga doim tayyordir”, dedi Obama.
AQSh prezidenti Fors ko’rfazidagi ittifoqdoshlari bilan ko’proq harbiy mashqlar o’tkazishga va’da berdi. Va’daga ko’ra, raketaga qarshi tizimni tashkil etishda, havo hujumlariga nisbatan oldindan ogohlantirish sistemasini vujudga keltirishda hamda maxsus kuchlar va chegarachilarni tayyorlashda AQSh Fors ko’rfazidagi ittifoqchilariga yordam beradi.
Ko’rfaz hamkorlik kengashi bosh kotibining yordamchisi Abdulaziz Uvayshiq ham Ko’rfaz davlatlari AQSh uchun muhim ekanligiga urg’u berdi.
“Ko’rfaz hamkorlik kengashi Qo’shma shtatlar manfaati uchun hayotiy masaladir”, dedi u jurnalistlarga bergan intervyusida.
