Qirg’iziston Qurolli kuchlari Bosh shtabi matbuot xizmatining xabar qilishicha, Qirg’izistonga Turkiya qurolli kuchlarining 7 nafar general va admirallari tanishuv safari bilan kelishdi. 12 may kuni Bosh shtab etakchisi Asanbek Alimkojaev turk delegatsiyasi bilan uchrashdi.
Turk delegatsiyasi a’zolari Bosh shtab va Mudofaa vazirligi rahbariyati, Bishkek garnizoni etakchi ofitserlari bilan uchrashuvlardan tashqari “Qant” aviabazasi, “Manas” qirg’iz-turk universiteti va “Doston” kompaniyasiga tashrif buyurish niyatida ekanliklari xabar qilinmoqda.
“Tashrifdan asosiy maqsad – ikki tomonlama harbiy va harbiy-texnik hamkorlikni kengaytirish va kuchaytirish, shuningdek, ikki davlat Qurolli kuchlari o’rtasidagi madaniy aloqalarni yo’lga qo’yishdan iborat”, – deyiladi matbuot xizmati xabarida. Turkiya harbiylar 15 may kuni jo’nab ketadi.
Turk harbiylar jo’nab ketishi ortidan Pokiston Bosh vaziri Navoz Sharif 20-21 may kunlari rasmiy tashrif bilan Turkmaniston va Qirg’izistonga keladi.
Xabar qilinishicha, tashrifdan asosiy maqsad TAPI va CASA-1000 nomini olgan qo’shma energetika loyihalarni muxokama qilishdan iborat.
Yuqori darajadagi muzokaralar davomida energiya ta’minoti dasturlarini muxokama qilish rejalashtirilgan. Xususan, Pokiston hukumati 2018 yilga borib energetik inqirozni xal etishi uchun Turkmanistondan gaz va Qirg’izistondan elektr energiyasi etkazib berilishi miqdorini oshirish masalalari ko’rib chiqiladi.
Turukmanistondan sotib olinadigan gazning miqdori Afg’oniston va Pokiston orqali Hindistonga o’tishi rejalashtirilgan yangi gaz quvuri (TAPI)ni ishga tushirish hisobiga oshirilishi kutilmoqda.
Navoz Sharifning Qirg’izistonga uyushtiradigan rasmiy safari davomida yoz mavsumida ishlab chiqariladigan elektr energiyasini Pokiston va Afg’onistonga (CASA-1000) loyihasini muxokama qilish rejalashtirilgani xabar qilinmoqda.
