“International Business Times” axborot agentligining xabar qilishicha, Saudiya Arabistoni boshchiligida Yamanga uyushtirilgan hujumlarda ishtirok etgan va bir oydan buyon Yaman aholisini havodan qirg’in qilib kelayotgan 100 nafar uchuvchining har biriga yaxshigina mukofot nasib qaladigan bo’ldi.
Dunyoning eng yirik boylari ichida 16 o’rinni egallab turgan Saudiya Arabistoni shaxzodasi Valid bin Talal uchuvchilarni rag’batlantirish uchun 100 nafar saudiyalik harbiy uchuvchiga qimmat baho “Bentley” markali super lyuks avtomobil sovg’a qilishi haqida o’z “Twitter” sahifasi orqali ma’lum qildi.
“Barqaror bo’ron harbiy amaliyotida qo’lga kiritgan muvaffaqiyatlaringiz uchun sizlarni tabriklayman. Bu vazifani bajargan 100 nafar uchuvchini 100 dona “Bentley” avtomobili bilan taqdirlayman”, deya yozdi shaxzoda Talal o’zining Twitter sahifasida.
Xabarlarda aytilishicha, Yamanga qarshi olib borilayotgan “Barqaror bo’ron” havo hujumida kamida mingdan ortiq musulmon halok bo’lgan, 4 mingga yaqin kishi og’ir tan jarohati olgan.
Saudiyaning sobiq qiroli Abdullohning jiyani shaxzoda Talal “Twitter” tarmog’ida 300 million dollarlik ulushga ega. Shaxzoda Talal Saudiya boyligidan 23 milliard dollarni qo’lga kiritib, dunyo milliarderlari safidan o’rin olgan. U bundan avval ham Saudiya Arabistoni milliy futbol terma jamoasi a’zolariga 25 dona “Bentley” markali qimmat baho avtomobil hadya qilgan edi.
