BMTning gumanitar masalalar bo’yicha agentligi mahalliy manbalarga tayanib xabar qilishicha, Saudiyaning Yamanga qilgan hujumi oqibatida 150 ming kishi uy-joylarini tashlab ketishga majbur bo’lgan. Bu esa BMT taxmin qilganidan 50%ga ortiqdir. Sog’likni saqlash tizimining ma’lum qilishicha, 19 martdan 13 aprelgacha 767 kishi halok bo’lgan. Oziq ovqat taqchilligidan aziyat chekayotganlarning soni 12 millionga etgan.
Bugunga kelib Saudiya o’zi xonavayron qilgan Yamanga 274 million dollarlik insoniy yordam berishga qaror qildi. Saudiya rasmiy axborot agentligi “SPA”ning xabar qilishicha, Riyoz hukumati Yaman xalqining yonida turganligini qayd etib, BMTning chorlovi balan Yamanga yordam berishga qaror qilgan.
“Saudiya Arabistoni BMT vositasida Yamandagi og’ir insoniy vaziyatga dastak bo’lishi uchun 274 million dollarlik yordam ko’rsatishga qaror qildi”, deyiladi xabarda.
BMT o’tgan xalqaro yig’ilishda kurash davom etayotgan Yamanning 7,5 million aholisiga 273,7 million dollarlik yordam ko’rsatish zarurligini ochiqlagan edi. Kuni kecha “buz” degan buyruqni olib Yamanni vayron qilgan Saudiya bugun “yordam” buyrug’ini oldi.
Ayni paytda AQSh prezidenti Barak Obama Saudiya qiroli Salmon bin Abdulaziz bilan telefon orqali suhbat o’tkazdi. Suhbatda asosan Yamandagi vaziyat muhokama qilindi. Ikki rahbar BMT xavfsizlik kengashidan o’tgan Yaman loyihasini ham muhokama qilishdi. Shuningdek, Yamanda siyosiy o’zgarishlar yasashga qaratilgan harakatlar, shu jumladan BMT tarafidan olib boriladigan uchrashuvlarga doir kelgusida tashlanadigan qadamlar haqida ham gaplashib olishdi.
Suhbat chog’ida Obama va qirol Salmon Yamanda doimiy tinchlikni saqlash va muammoga siyosiy echim topish borasida hamfikr ekanliklarini qayd etishdi. Hujum oqibatida insoniy yordamga muxtoj yamanliklarning ahvoli haqida ham gaplashib olindi.
Oq uydan berilgan bayonotga ko’ra, Obama Qirol Salmon bilan o’tkazgan suhbatida AQSh va Saudiya o’rtasidagi kuchli do’stona munosabatni yana bir bor tasdiqlab, Saudiya davlat xavfsizligi borasida AQShning majburiyatlariga alohida urg’u berib o’tdi.
