Frantsiya prezidenti Frantsua Olland Ukraina inqirozini hal qilishda oldinga siljish yuz bergan taqdirda Rossiyadan jazo choralari olib tashlash lozimligini bildirdi. Ollandga ko’ra, Rossiya prezidenti Vladimir Putin Ukraina Sharqini Qrim kabi o’z eriga qo’shib olmoqchi emas, balki uning birlamchi maqsadi Ukrainaning NATO harbiy blogiga a’zo bo’lishdan to’sishdir.
“Putin Ukraina Sharqini o’ziga qo’shib olmoqchi emas. Bu haqida uning o’zi menga aytdi. Men uni tasdiqlamasligim mumkin, biroq bu Qrim emas. U Ukrainaning NATO harbiy blogiga a’zo bo’lishiga qarshi”, dedi prezident Olland 5 yanvar kuni Frantsiyaning “France inter” radiosiga bergan intervyusida.
Ayni paytda Frantsiya prezidenti Rossiya hukumati Ukraina sharqidagi ayirmachilarni qo’llab quvvatlashni bas qilishi va Ukrainaning hududiy yaxlitligini hurmat qilishi lozimligini ta’kidladi. Shuningdek Olland Ukraina inqirozi hal qilinishidan Yevropa ham manfaatdor ekanligiga ishora qildi. Chunki uning ta’kidlashicha, Rossiyaga qarshi joriy qilingan jazo choralari Yevropa iqtisodiga ham salbiy ta’sir qiladi.
“Rossiyada inqiroz yuzaga kelsa bu Yevropa uchun yaxshilik bo’lishini anglatmaydi. Menimcha, jazo choralarini bekor qilish kerak. Bu borada ijobiy o’zgarish bo’lsa jazo choralari to’xtatilishi lozim. Agar ijobiy o’zgarish bo’lmasa, jazo choralari ham o’z kuchida qolaveradi”, dedi Prezident Olland.
Frantsiya prezidenti 15 yanvarda mojaroni hal qilish uchun Qozog’iston poytaxti Ostonada o’tkaziladigan yig’ilish haqida ham gapirib o’tdi. Olland uchrashuvda muzokara olib borish orqali bu borada oldinga siljishlar yuzaga kelishiga umid bildirdi.
“15 yanvar kuni Ostonaga bitta shart bilan boraman. Bu shart – yangi o’zgarishlarga erisha olishimizdir. O’ylaymanki, bu amalga oshadi”, dedi Frantsua Olland.
Biroq AQSh bu yig’ilishga ishtirok etmaydi. Bu haqida AQSh Davlat departamenti rasmiy vakili Jen Psaki 5 yanvarda tashkil qilingan ma’lumot yig’nida ma’lum qildi. AQShning hisoblashicha, Moskva va Ukraina sharqidagi ayirmachilar o’t ochishni tuxtatsagina jazo choralarining ayrimlari bekor qilinadi.
