Qirg’iziston respublikasi energetika va sanoat vaziri vazifasini bajaruvchi Qubanchbek Turdibaev 16 oktyabr kuni bo’lib o’tgan parlament yig’ilishida, elektr energiyasini rejali o’chirishni joriy etishni taklif qildi.
“Suvni va elektr energiyasini tejashimiz zarur, aks holda butun tizimni barbod qilamiz. Shuning uchun elektr energiyasini birinchi bosqichda tunlari, ikkinchi bosqichda esa, kechqurunlari rejali o’chirishni joriy etishni taklif qilamiz. Rejali o’chirishlar hisobiga 1,2 milliard kVt/soat elektr energiyasini tejab qolish mumkin bo’ladi”, – dedi Turdibaev.
Uning so’zlariga ko’ra, isitish mavsumidan muvaffaqiyatli o’tish uchun respublikaga qo’shimcha 2,3 milliard kVt/soat elektr energiyasi kerak bo’ladi. “Maishiy iste’molchilar uchun 700 kVt/soatgacha elektr narxini 70 tiyin (1,3 tsent) qilib qoldirishni taklif qilamiz. Elektr energiyasidagi taqchillik sababli shunday qilishga majburmiz. Yo svetni o’chiramiz, yoki sotib olamiz. Shuning uchun biz 700 kVt/soatdan ortiq ishlatilgan elektr energiyasi uchun narxlarni oshirishni va shu bilan birga uch fazali elektrqazonlarni uzmaslikni hamda uch fazali va bir fazalilar uchun yagona tarif joriy qilishni taklif qilamiz”.
Turdibaevning ma’lum qilishicha, energetika vazirligi elektr energiyasini sotib olish bo’yicha muzokaralar olib bormoqda. “Turkmaniston bilan muzokaralar olib borilmoqda, 1 noyabr kuni u yoqqa yirik delegatsiya jo’nab ketadi. Muzokaralarning dastlabki bosqichi muvaffaqiyatli o’tdi, ammo bu bu loyihani amalga oshirish uchun biz elektr energiyasini O’zbekiston orqali olib o’tishimiz kerak bo’ladi. Dastlabki hisoblarga ko’ra, Turkmaniston bir kVt/soat elektr energiyasini 2,5-2,7 tsentdan sotishga tayyor, bunga O’zbekiston orqali olib o’tganimiz uchun tranzit haqi ham qo’shiladi. Ammo bu hozircha yakuniy hisob emas. Shuningdek Qozog’iston va Rossiyadan ham elektr sotib olish yo’llari ko’rib chiqilmoqda”, – dedi Turdibaev.
Turkiston:
Energetika vaziri vazifasini bajaruvchi Qubanchbek Turdibaev elekrt energiyasini rejali o’chirishni taklif qilishga biroz kechikkan ko’rinadi. Chunki, respublikaning janubiy viloyatlarida elektr energiyasiga cheklov kiritilganiga ancha vaqt bo’ldi.
O’sh viloyatidagi shahar va qishloqlarida sutkasiga 8-9 soatlab svetni o’chirish odatiy holga aylanib bo’ldi. Aholi nafaqat svet tanqisligi, balki ichimlik suvi etishmasligidan ham aziyat chekmoqda. Buning sababi svet o’chishi ortidan odatda elektr quvvati bilan ishlaydigan suv nasoslari ham to’xtab, odamlar pulga ichimlik suvi sotib olishga ham majbur bo’lishmoqda.
