Bugun, 2 oktyabr kuni Qirg’iziston parlamenti mamlakatni Bojxona ittifoqiga qo’shilishi bo’yicha qonun loyihasining birinchi paketini ko’rib chiqdi.
Parlament yig’ilishda ishtirok etgan iqtisod vaziri Temir Sariev, “Biz Bojxona ittifoqiga a’zo davlatlar bilan bojxona to’lovlaridan Qirg’izistonga qancha ajratilishi bo’yicha muzokaralar olib bormoqdamiz”, – dedi.
Uning so’zlariga ko’ra, Qirg’iziston har yili bojxona to’lovlaridan 8 milliard somga yaqin daromad oladi. Bojxona ittifoqida esa umumiy yig’ilgan to’lovlar miqdoridan har bir davlat uchun ulush ajratib qo’yilgan. Bugungi kunda yig’ilgan umumiy bojxona to’lovlaridan Rossiya 87,97 foiz, Belorus 4,7 foiz, Qozog’iston esa 7,03 foiz ulush oladi.
“Qirg’iziston Bojxona ittifoqiga qo’shilganidan so’ng bu tartib o’zgaradi. Hozir bizning ulushimiz qancha bo’lishi to’g’risida muzokaralar olib bormoqdamiz. Ammo aytish mumkinki, Bojxona ittifoqiga qo’shilganimizdan so’ng har qanday holatda ham hozirgiga qaraganda ko’proq kirimga ega bo’lamiz. Yo’qotish bo’lmaydi. Biroq, soliqlarni ham yig’ish kerak bo’ladi”, – dedi iqtisod vaziri.
Turkiston:
Qirg’iziston hukumati Bojxona ittifoqiga a’zo bo’lib kirish evaziga Qirg’izistondan borgan mehnat muhojirlarini BIga a’zo davlatlar hududida imtiyozli shartlar asosida bo’lishi hamda ishlab chiqarish sanoatini rivojlantirishga ko’mak ko’rsatilishni xohlamoqda.
Qirg’iziston hukumatining bunday talablari bu tashkilot asoschisi bo’lgan Rossiya manfaatlariga mos kelmagani sababli rasmiy Bishkek bilan kelishuv tuzishga shoshilmay kelmoqda. Chunki Rossiyani BI tashkil etishdan asosiy maqsadi bugungi kunda zamonaviy talablarga javob bera olmay qolgan o’z maxsulotlari uchun yangi bozor ochishdan iborat. Umumiy bojxona yig’imlaridan ajratiladigan ulush qancha bo’lishidan qat’iy nazar bu erdagi asosiy e’tibor Qirg’izistonni iqtisodiy mustamlaka qilishga qaratilgan.
