Qrim yarim orolining Simferopol shahri ko’chalarida huquq tartibot xodimlari hijobli muslimalarni to’xtatib hujjat talab qilishmoqda.
“Simferopolda hijobli qizlarni to’xtatib hujjat so’rashmoqda. (Shuncha yildan buyon o’zimiz bilan pasport olib yurmagan edik, mana endi yangi hukumat kelib shunga majbur bo’lyapmiz). Allohning o’zi bizga yordam bersin”, deb yozadi Qrimlik muslimalardan biri o’zining Facebook ijtimoiy tarmog’ida.
“15 minut” axborot agentligining xabar qilishicha, bunga o’xshash holatlar Simferopol va Baxchasaray shaharlarida kuzatilgan. Huquq tartibot xodimlari muslimalardan hujjat talab qilayotganda buning sabablari haqida tushintirish bermaganligi aytiladi xabarda.
Qrim musulmonlari diniy boshqarmasi bu kabi hodisalardan hech bir musulmon muftiyotga shikoyat qilmaganligini, biroq bunday holatlar bo’lib turishi ehtimoldan xoli emasligini bildirdi.
Qrim muftisining o’rin bosari Ayder Ismailov huquq tartibot xodimlarining bu harakatlarini qabul qilib bo’lmaydigan holat deb sifatladi.
“Agar diqqat e’tibor aynan hijobli ayollarga qaratilib, ularning hujjatlari tekshirilayotgan bo’lsa albatta bu qabul qilib bo’lmaydigan holat va musulmonlarning tuyg’ularini haqoratlashdir”, deya ta’kidladi Qrim muftisining o’rin bosari Ismailov.
