Ukrainaning Donesk shahrida rossiyaparast ayirmachilar shahar aeroportini ishg’ol etganidan so’ng Ukraina askarlarining harbiy amaliyotlari tinimsiz davom etmoqda.
Rossiyaparast ayirmachilar matbuot byurosining bergan bayonotiga ko’ra, ikki kun davom etgan amaliyotda 100ga yaqin kishi hayotdan ko’z yumib, juda ko’pchilik inson jarohat olgan. Bu haqida ayirmachilar rahbarlaridan biri Denis Pushilin ma’lum qildi.
Pushilin o’lganlarning 50 chog’lisini “Donesk milliy mudofaa kuchlari”ga bog’liq qurolli kuchlardan ekanligi, qolgan 30 bilan 50 orasidagi kishilar esa tinch fuqarolardan ekanligini ochiqladi.
Og’ir qurollar ishga solingan jangda Ukraina havo kuchlari vertalyotlar bilan mintaqani bombaga tutganligi aytilmoqda.
Bu haqida bayonot bergan Rossiya prezidenti Vladimir Putin “Ukraina harbiylari jazoga loyiq ishlarini darhol to’xtatmog’i lozim”, deya ta’kidladi.
Ukraina harbiylari shahar markazi tomon ilgarilab borar ekan, ayirmachilar yo’llarda to’siqlar o’rnatishgan. Qum to’ldirilgan qoplar bilan to’siq yasagan ayirmachilar yoqilg’ilar bilan to’ldirilgan shishalar bilan qurollanganligi e’tiborga molik.
Ayni paytda olingan xabarga ko’ra, bir kun davom etgan to’qnashuvdan so’ng Ukraina harbiylari aeroport nazoratini o’z qo’llariga olganlar. Biroq talofatlar talaygina.
