Prezident apparatining xabar qilishicha, Almazbek Atambaev KXShTga a’zo davlatlarning norasmiy sammitida ishtirok etish uchun jo’nab ketdi.
Qirg’iziston prezidenti Rossiya Federatsiyasi prezidenti Vladimir Putin taklifiga binoan Kollektiv xavfsizlik shartnomasi tashkilotiga a’zo davlatlarning norasmiy sammitida ishtirok etish uchun 7 may kuni Moskvaga etib keldi.
8 may kuni Moskva shahrida Armaniston, Belorussiya, Rossiya, Tojikiston va Qirg’iziston davlat rahbarlarining norasmiy uchrashuvi bo’lib o’tadi. Mazkur uchrashuv doirasida davlat rahbarlarini Rossiya Qurolli kuchlarining o’quv mashg’ulotlarida ishtirok etishi rejalashtirilgan.
Bundan tashqari 8 may kuni bo’lib o’tadigan ikkitomonlama uchrashuvda Atambaev Putin bilan Qirg’izistonni Bojxona ittifoqiga a’zo bo’lishi, energetika loyihalari va “Rosneft” kompaniyasini “Manas” aeroportini modernizatsiyalash jarayonida ishtirok etishi masalalarini muxokama qilishi rejalashtirilgan.
Qirg’iziston prezidenti apparatining tashqi siyosat bo’limi mudiri Sapar Isaqovning xabar qilishicha, ikkitomonlama uchrashuv KXShT doirasida rejalashtirilgan tadbirdan so’ng bo’lib o’tadi.
“Bir necha kundan beri Moskvada Qirg’izistondan kelgan tegishli vazirlik va idora vakillaridan iborat ishchi guruhi ish olib boryapti. Ish besh kundan buyon davom etmoqda. Bu guruhni Bosh vazir Jo’mart O’tarboev o’zi bilan olib kelgan edi. Bevosita uning topshirig’iga binoan Qirg’izistonni Bojxona ittifoqiga a’zo bo’lishi yuzasidan Rossiya Federatsiyasi bilan ikkitomonlama dastur ishlab chiqilmoqda. Oldindan shuni aytishim mumkinki, ish jadal sur’atda ketmoqda”, – dedi Isaqov.
Turkiston:
Qirg’iziston Bosh vaziri Jo’mart O’tarboevning 7 may kuni bergan bayonotiga ko’ra, ayni vaqtda iqtisod vaziri o’rinbosari Daniil Ibraev boshchiligidagi delegatsiya Moskva shahrida Qirg’izistonni BI a’zo bo’lish muddatini bir yilga kechiktirish uchun rus hukumati vakillari bilan muzokara olib bormoqda.
Uning so’zlariga ko’ra, Qirg’izistonni BI a’zo bo’lib kirish rejasi hozircha tayyor emas. Bosh vazirning aytishicha, hukumat yaqin vaqtlar ichida rejani tayyorlaydi va umumiy muxokamaga olib chiqadi.
O’tarboev qo’shimcha qilib, a’zo bo’lish rejasi qirg’iz xalqi tomonidan ma’qullansa va hukumat tomonidan tasdiqlanishi bilan bu rejani Bojxona ittifoqiga a’zo bo’lgan – Rossiya, Qozog’iston va Belarussiya davlatlariga tasdiqlash uchun jo’natiladi.
Bosh vazir avval Rossiya bochilik qilayotgan Bojxona ittifoqiga a’zo bo’lishlik o’z mamlakati uchun “to’g’ri tashlangan qadam” bo’lishi hamda ko’plab iqtisodiy va ijtimoiy muammolarni xal bo’lishiga yordam berishi haqida aytib o’tgan edi.
Ammo Putin boshchiligidagi Rossiya hukumati Atambaevga hech qanday tanlash imkoniyati qoldirmay, Qirg’izistonni Bojxona ittifoqiga a’zo bo’lib kirishga majburlashda davom etmoqda.
