BMT xavfsizlik kengashida brifing o’tkazgan BMT va arab davlatlari ligasining Suriya ishlari bo’yicha maxsus vakili Lahdar Brahimiy Jeneva konferentsiyasini davom ettirish istagida ekanligini ta’kidladi.
“Agar Jeneva konferentsiyasining uchinchi bosqichini o’tkashizga erishsak, o’ylaymanki, bu Jeneva-2ga qaraganda natijaliroq bo’ladi”, dedi Brahimiy Suriya mavzusida so’z yuritar ekan.
Xabarlarda aytilishicha, Lahdar Brahimiy BMT bosh kotibi Pan Gi Munga va BMT xavfsizlik kengashiga Suriya masalalariga bog’liq hisobot taqdim qilish uchun Nyu-Yorkka kelgan. Brahimiy Nyu-York shahrida yopiq eshiklar ortida o’tgan yig’ilishdan so’ng jurnalistlarga bayonot berdi.
“Jeneva konferentsiyasini davom ettirish haqida bosh qotiryapmiz”, deya qayd etdi BMT vakili. “Agar Jeneva konferentsiyasining uchinchi bosqichini BMT xavfsizlik kengashi hamda boshqa faol davlatlar va tashkilotlarning yordami bilan boshlashga muvaffaq bo’lsak, buning Jeneva-2dan ko’ra natijaliroq bo’lishiga ishonchim komil”, deb qo’shimcha qildi u.
Brahimiy o’tgan Jeneva konferentsiyasining muvaffaqiyatsiz yakun topishidan kim javobgar ekanligi haqida berilgan savolga hazil aralash “ehtimol bu mening xatoyimdir”, deb javob berdi.
