Federal bojxona xizmatining etakchisi Andrey Belyanikov boshchiligida Rossiya davlat delegatsiyasi Qirg’izistonga keldi. Rossiya va Qirg’iziston rasmiylari uchrashuv o’tkazib, “Manas” havo bazasiga sarmoya yotqizish bo’yicha memorandumga imzo chekishdi.
Rossiya davlati “Manas” havo bazasiga bir milliard dollar investitsiya yotqizishni va’da qilmoqda. Qirg’iziston bosh vazirining birinchi o’rinbosari Joomart Otorbaevning ozodlikka bildirishicha, hozircha sarmoyaning shartlari va aktsiyalarning ulushlari ustida kelishuv bo’lgan emas.
“Manas aeroportida biz xab uyushtirishimiz kerak. Xorijiy o’lkalarning samalyotlari ko’proq uchib-qo’nishlari biz uchun foydali. Manasdan AQSh harbiy bazasi chiqib ketmoqda. Biz bu erdagi harbiy samalyotlarining o’rniga oddiy fuqarolar tashuvchi samalyotlarni qabul qilishimiz kerak. Rossiya katta davlat, uning aviakompaniyalari ham ko’p. Ular bizning aeroportimiz orqali qanchalik ko’p uchishni yo’lga qo’ysa, keldi-ketdi ko’p bo’lsa bizning byudjetga shunchalik ko’proq daromad tushadi. Shuning uchun Rossiya bizga kerak”, dedi Joomart Otorbaev.
Oturbaev Moskvaning O’shdagi xalqaro aeroportni ham yangi ta’mirdan o’tkazib berish niyati borligini qo’shimcha qildi.
“O’sh aeroportini yangidan quramiz degan niyatimiz bor. Chunki bu aeroportning kelajagi bor. Bishkekdagi Manas aeroportining yalpi bozordagi ko’lami 2 million bo’lsa, O’sh aeroportining yalpi bozordagi ko’lami 15 millionni tashkil qiladi. O’zbekiston va Tojikistonning yaqinligini hisobga olsak, bu aeroportning kelajagi porloq. Ammo bu aeroportni boshdan-ayoq yangidan qurishimiz kerak. Batken aeroportini ham rivojlantirishimiz lozim. Bularning barchasi uchun investitsiya kerak bo’ladi. Shuning uchun biz “Rosneft” kompaniyasi bilan kelishimlarni imzoladik. Nasib etsa, shu asosda loyihalar tayyorlab parlamentga taqdim qilamiz”, dedi u.
Norasmiy ma’lumotlarga qaraganda, Moskva Manas aeroportining 51% aktsiyasini talab qilmoqda. Shu bois ba’zi ekspertlarning fikricha, Rossiya Manas aeroportiga to’liq ega bo’lib qoladi. Hatto qirg’iz samalyotlari ham Rossiyaning qosh-qovog’iga qarashga va uchib-qo’nganligi uchun Rossiyaga pul to’lashga majbur bo’ladi.
Manas aeroportini Rossiyaga berish yoki bermaslikni parlament hal qiladi. Qirg’iz parlamenti “yirik miqdorda investitsiya yotqizadi”, degan umid bilan “Qirg’izgaz”ni bir dollarga Rossiyaga sotilishiga rozilik bergan edi.
