“Gazeta.uz” nashrining xabar qilishicha, Toshkenti shahar hokimi Rahmonbek Usmonov 15-16 fevral, dam olish kunlarida umumxalq hashari o’tkazishlik to’g’risidagi farmoyishni imzoladi. Bu hasharni uyushtirishdan asosiy maqsad poytaxtni qor va muz qoldiqlaridan tozalashdan iborat.
Shahar hokimiyati axborot xizmatining xabarida, hozir sovuq bo’shashdi, biroq, ko’p ko’chalarda, ayniqsa quyoshga teskari bo’lganlarida qor va muz erib ketgani yo’q, bu esa transport va piyodalar harakatini qiyinlashtirmoqda, deyiladi.
Hokim farmoyishiga muvofiq nafaqat qor va muzlarni chiqarib tashlash, balki qorlar tezroq erib ketishi uchun ko’chalarga tuz va qum sepib chiqish ham rejalashtirilgan. Savdo tarmoqlari, maishiy xizmat va umumiy ovqatlanish hamda bozorlar hududlari tozalanishi nazarda tutilgan. Qor va muzlarni o’z vaqtida olib chiqib ketish uchun qo’shimcha transport vositalari jalb qilinadi.
Hasharga mulkchilik turidan qat’iy nazar barcha tashkilot va muassasa xodimlari hamda shahar aholisi jalb qilinadi. Hasharni uyushqoqlik bilan o’tkazish vazifasi tuman hokimlari va mahalla raislariga yuklatildi, deyiladi hokimiyat axborot xizmati xabarida.
Turkiston:
O’zbekiston hukumati o’z xalqini ekspluatatsiya qilish uchun qadimdan O’rta Osiyo xalqlarida urf bo’lgan hashar ishidan keng ko’lamda foydalanib kelmoqda. Barchaga ma’lumki, hashar ixtiyoriy ish bo’lib, har kim o’z istagidan kelib chiqib bu ishga o’z hissasini qo’shishi mumkin. Ammo O’zbekistonda mana shu hashar ham hukumat tomonidan har bir kishi uchun majburiy qilib belgilab qo’yilgan.
Bunday hasharlarda har doimgidek asosiy balogardon byudjet tashkiloti xodimlari, yanayam aniqrog’i maktab va kollej o’qituvchilari bo’lishadi. Bugungi kunda O’zbekistonda paxta dalalarida” javlon” urayotganlar ham, aholining elektr va gazdan bo’lgan qarzdorligini undirishga jalb etilayotganlar ham, namunali uy-joy qurilishlarida hammolik qilayotganlar ham, metallolom yoki makulatura yig’ish, stadion yoki harbiy poligonlarni tazalayotganlar ham o’qituvchi deb atalmish “sharafli” kasb egalaridir.
“Baliq boshdan sasiydi” deganlaridek yuqoridan o’rnak olgan va egallab turgan mansabidan foydalanib boylik tshplab olish payida bo’lgan mahalliy hokimiyat rahbarlari esa hasharni ham boylik ortirish manbaiga aylantirib olishgan. Namunali uylar urilishiga, shahar obodonchiligiga va boshqa maqsadlarda ajratilgan mablag’larni o’zlashtirib olgan hokimlar bularni o’rnini to’ldirish uchun o’qituvchi, o’quvchi, shifokor va odamlarni ixtiyoriy-majburiy ravishda hasharga jalb qiladi va ularning bir yoki ikki kunlik ish haqlarini “davlat” byudjetiga o’tkaziladi, qarabsizki quruvchi, terimchi, ko’cha tozalovchi va boshqalarning ish haqlari hokimning cho’ntagiga tushadi. Oddiy xalq esa men nima uchun quruvchi, ko’cha supiruvchi yoki boshqalar uchun tekinga ishlab berishim kerak, ularning ish haqlari uchun ajratilgan mablag’lar qayoqqa ketmoqda deb so’rashga haddi sig’may “Hashar – elga yarashar” deb, aldanib yuraveradi.
